ធ្មេចបើកៗ ពិធីមង្គលការរបស់តារាចម្រៀងស្រី កញ្ញា រ៉ាប៊ី និង កីឡាករបាល់ទាត់កូនកាត់ខ្មែរ អាមេរិក Nick Taylor កាន់តែកៀកជិតមកដល់ហើយ ក្រោយពីខាងប្រុសបានលុតជង្គង់សុំមិត្តស្រីរៀបការកាលពីខែមុនកន្លងទៅ។
តាមរយៈការបង្ហោះលើហ្វេសប៊ុកផេករបស់តារាចម្រៀងស្រី រ៉ាប៊ី បង្ហាញរូបភាពធៀបការបានឱ្យដឹងថា នាង និង លោក Nick Taylor ត្រៀមរៀបចំកម្មវិធីមង្គលការយ៉ាងធំដុំមួយនៅថ្ងៃទី ៩ ខែឧសភា ឆ្នាំ ២០២៥ ខាងមុខនេះ។
ក្នុងនោះ អនាគតស្វាមីភរិយាថ្មីខាងលើ ក៏បានដឹកដៃគ្នា ថត Pre-Wedding នៅលើទឹកដីអង្គរយ៉ាងផ្អែមល្ហែម សម្រាប់ថ្ងៃពិសេសរបស់អ្នកទាំងពីរ ខណៈរោងការក៏បាន និង កំពុងរៀបចំបណ្តើរៗហើយដែរ។
ដោយឡែក កាលពីយប់ថ្ងៃទី ០៥ ខែឧសភា ឆ្នាំ ២០២៥ កន្លងទៅនេះ កញ្ញា រ៉ាប៊ី បានទៅព្រលានយន្តហោះ ដើម្បីទទួលស្វាគមន៍គ្រួសារសាច់ថ្លៃ ដោយមានអ្នកម្តាយក្មេក ឪពុកក្មេក និង ប្អូនប្រុសបង្កើតរបស់លោក Nick Taylor ពោរពេញដោយស្នាមញញឹម។ ក្នុងនោះ អ្វីដែលចាប់អារម្មណ៍បន្ទាប់ពី កញ្ញា រ៉ាប៊ី បានបង្ហោះវីដេអូទៅទទួលគ្រួសារសាច់ថ្លៃហើយនោះ ស្រាប់តែអ្នកគាំទ្រចូលទៅខមមិនហៅ កញ្ញា រ៉ាប៊ី «បងថ្លៃ» ព្រោងព្រាត ក៏ព្រោះតែឃើញសម្រស់ប្អូនប្រុសរបស់លោក Nick Taylor ពិតជាសង្ហា រូបរាងខ្ពស់ស្រឡះ ស្នាមញញឹមមានមន្តស្នេហ៍មិនចាញ់បងប្រុសនោះទេ៕
សូមចុចទីនេះ ដើម្បីទស្សនាវីដេអូទី ១៖
សូមចុចទីនេះ ដើម្បីទស្សនាវីដេអូទី ២៖
