និយាយពីកូនប្រុសស្រីរបស់តារាចម្រៀងប្រុសលោក ខាត់ ជេមស៍ មហាជនជ្រាបហើយថាកន្លងមក តែងទទួលបានការចាប់អារម្មណ៍ និង សរសើរជាមួយរូបរាងស្អាតៗគួរឱ្យស្រឡាញ់ ភាពវៃឆ្លាត និង សមត្ថភាពផ្សេងៗរបស់ពួកគេ ដែលឃើញថាសុទ្ធសឹងតែមានដុងសិល្បៈបេះដាក់មិនចាញ់ឪពុកនោះឡើយ។
បើចាប់អារម្មណ៍ពីកូនប្រុសស្រី ២ រូបរបស់លោក ខាត់ ជេមស៍ គឺកូនស្រីច្បងឈ្មោះ អេមមី និង កូនប្រុសទីពីរឈ្មោះ សក្កដា ឃើញថាកំពុងតែបោះជំហានលើវិស័យចម្រៀងយ៉ាងពេញទំហឹង ដែលបច្ចុប្បន្នអ្នកទាំងពីរកំពុងស្ថិតក្រោមផលិតកម្មកាឡាក់ស៊ីណាវ៉ាត្រា ដូចលោកឪពុកដែរ។ យ៉ាងណាមិញ កន្លងមក អេមមី និង សក្កដា ក៏បានចេញស្នាដៃបទចម្រៀងថ្មីបន្តបន្តាប់ ព្រមទាំងបង្ហាញវត្តមានលើឆាកប្រគំតន្រ្តីតូចធំផ្សេងៗជាមួយតារាចម្រៀង ខាត់ ជេមស៍ ផងដែរ។
ជាក់ស្ដែង ថ្មីៗនេះ អ្វីកាន់តែចាប់អារម្មណ៍ ខណៈឈានចូលដល់រដូវកាលចូលឆ្នាំខ្មែរ ក៏បានឃើញលោក ខាត់ ជេមស៍ និង កូនប្រុសស្រីទាំង ២ រូបនេះ បានបញ្ចេញស្នាដៃបទចម្រៀងម្នាក់ ១ បទរៀងៗខ្លួន ត្រៀមសម្រាប់អបអរពិធីបុណ្យចូលឆ្នាំថ្មីប្រពៃណីខ្មែរខាងមុខ។ ក្នុងនោះ លោក ខាត់ ជេមស៍ បានចេញ MV បទចម្រៀងមានចំណងជើងថា «កុំភ្លេចមើលកុង» រីឯកូនស្រីច្បងចេញ MV បទចម្រៀង «រាំឱ្យលះ» និង MV របស់កូនប្រុសទីពីរ មានចំណងជើងថា «ស្នេហ៍លេងៗ» ដែលបទចម្រៀងប៉ុន្មានបទនេះ កំពុងពេញនិយមខ្លាំង ផ្ទុះការចែករំលែកគាំទ្រពីសំណាក់មហាជនអ្នកគាំទ្រទាំងលើហ្វេសប៊ុក និង TikTok៕
សូមចុចទីនេះដើម្បីទស្សនាវីដេអូ៖
សូមចុចទីនេះដើម្បីទស្សនាវីដេអូ៖
សូមចុចទីនេះដើម្បីទស្សនាវីដេអូ៖
