យប់មិញនេះ ពោលគឺនៅរាត្រីថ្ងៃទី ១០ ខែវិច្ឆិកា ឆ្នាំ ២០២៤ កម្មវិធីប្រឡងចម្រៀងដ៏ធំលំដាប់ថ្នាក់ពិភពលោក Cambodian Idol រដូវកាលទី ៥ បានរកឃើញម្ចាស់ជ័យលាភីប្រចាំរដូវកាលថ្មីហើយ គឺបានទៅលើលោក គី សាវីន។
គី សាវីន គឺជាបេក្ខជនដ៏ឆ្នើម និង មានភាពលេចធ្លោខ្លាំង ចាប់តាំងពីលោកបង្ហាញវត្តមាននៅក្នុងវគ្គ Jude Audition មកម្ល៉េះ ដោយ សាវីន បានលើកយកបទ «អនអើយស្រីអន» មកបកស្រាយមុខគណៈកម្មការយ៉ាងពីរោះរណ្ដំទ្រហឹងពេញឆាក ហើយកាលនោះ សាវីន មិនត្រឹមតែឆក់បានការពេញចិត្តខ្លាំងពីគណៈកម្មការទាំង ៤ នោះទេ ងាកមកទស្សនិកជនវិញ ក៏ពេញចិត្តចំពោះបេក្ខជនរូបនេះខ្លាំងណាស់ដែរ។
មកដល់រាត្រីថ្ងៃទី ១០ ខែវិច្ឆិកា ឆ្នាំ ២០២៤ ដែលជាថ្ងៃប្រកួតផ្ដាច់ព្រ័ត្រ គី សាវីន កាន់តែធ្វើបានយ៉ាងល្អ តាមរយៈបទចម្រៀងដែលលោកជ្រើសរើសយកមកប្រកួតប្រជែង ហើយទីបំផុត សាវីន ក៏ទទួលបានសំឡេងបោះឆ្នោតច្រើនជាងគេពីទស្សនិកជន និង ក្លាយជាម្ចាស់ជ័យលាភីក្នុងរដូវកាលថ្មីនេះ៕
