បើគិតត្រឹមថ្ងៃទី ០៨ ខែកញ្ញា ឆ្នាំ ២០២៥ នេះ គឺរយៈពេល ៤ ថ្ងៃមកហើយ នៃដំណើរបេសកកម្មរបស់បវរកញ្ញាដ៏មានប្រជាប្រិយភាព កុយ អេនណា នៃការដើរចាកចេញពីទីក្រុងភ្នំពេញទៅកាន់ខេត្តសៀមរាបក្នុងកម្មវិធីសប្បុរធម៌លើកដំបូងរបស់ខ្លួនក្រោមប្រធានបទ «ដើរដោយក្តីសង្ឃឹម ដើរដើម្បីទេសចរណ៍»។
ក្នុងនោះ ដំណើរថ្មើរជើងនេះ កញ្ញា កុយ អេនណា ធ្វើឡើងក្នុងគោលបំណង ២ គឺ ដើម្បីរៃអង្គាសថវិកាសប្បុរសធម៌ ជួយគាំទ្រដល់ក្មេងៗ ឬជនពិការក្នុងមណ្ឌលខ្វះខាតនៅកម្ពុជា និង ដើម្បីចូលរួមចំណែកផ្សព្វផ្សាយពីការធ្វើដំណើរទេសចរណ៍ពីរាជធានីភ្នំពេញឆ្ពោះទៅកាន់ទឹកដីសៀមរាបប្រមាណជាង ៣០០ គីឡូម៉ែត្រ។
ស្របគ្នាក្នុងការបង្ហាញនូវការសរសើរ និង មោទកភាពយ៉ាងខ្លាំងនៃឆន្ទៈដ៏មោះមុតរបស់ កញ្ញា កុយ អេនណា ដែលជាបវរកញ្ញា និង ស្ត្រីដំបូងគេបានលះបង់កម្លាំងកាយចិត្ត ដើរថ្មើរជើងទៅកាន់ខេត្តសៀមរាប បើទោះជាដឹងថាមានការលំបាកយ៉ាងណាក្តី។ តែយ៉ាងណាក៏ដោយ តាមរយៈការចែករំលែកព័ត៌មានប្រចាំថ្ងៃនៃបេសកកម្មនេះដែរ កញ្ញា កុយ អេនណា បានបង្ហាញក្តីរំភើបយ៉ាងខ្លាំង ខណៈដើរទៅដល់ទីណា មានបងប្អូនប្រជាពលរដ្ឋ អ្នកលក់ដូរ សិស្សានុសិស្ស គ្រូពេទ្យ ព្រះសង្ឃ រង់ចាំស្វាគមន៍ផ្តល់កម្លាំងចិត្តដល់នាង។
លើសពីនោះ មិនត្រឹមតែជាការលើកទឹកចិត្តនោះទេ កញ្ញា កុយ អេនណា ក៏ទទួលបានការឧត្ថម្ភប្រាក់ចូលរួមកម្មវិធីកម្មវិធីសប្បុរធម៌របស់នាង ព្រមទាំងទទួលបានទាំងអាហារ ថ្នាំសង្កូវ និង បញ្ញើផ្សេងៗពីអ្នកគាំទ្រសម្រាប់នាងផ្ទាល់ថែមទៀតផង៕
សូមចុចទីនេះ ដើម្បីទស្សនាវីដេអូ៖
