ពិតណាស់ ក្រៅពីមហាជនបង្ហាញការគាំទ្រលើកទឹកចិត្តពីចម្ងាយចំពោះបវរកញ្ញា ហ្វីយ៉ាតា ក៏បានឃើញបវរកញ្ញា អ៊ិន លក្ខិណា ប្រកាសពីដំណឹងថានាង និង ក្រុមការងារ ចេញទៅកាន់ប្រទេសថៃ ដើម្បីផ្ដល់កម្លាំងចិត្តដល់បវរកញ្ញា ហ្វីយ៉ាតា ដោយផ្ទាល់ក្នុងវគ្គប្រកួតបឋម និង វគ្គប្រកួតផ្ដាច់ព្រ័ត្រនៃកម្មវិធីអន្តរជាតិ Miss Universe 2025 ទៀតផង។
មកដល់ថ្ងៃទី ១៩ ខែវិច្ឆិកា ឆ្នាំ ២០២៥ នេះ ចំពោះដំណើរការប្រកួត វគ្គបង្ហាញឈុតតំណាងជាតិរបស់បវរកញ្ញាកម្ពុជា ហ្វីយ៉ាតា កំពុងធ្វើឱ្យមហាជនអ្នកគាំទ្រផ្ទុះចែករំលែកសរសើរ និង រំភើបពេញដោយក្ដីមោទកភាពខ្លាំងចំពោះរូបនាង ដែលបវរកញ្ញារូបនេះ បានដើរបង្ហាញឈុតតំណាងជាតិលើឆាកអន្តរជាតិដ៏អស្ចារ្យនេះបានយ៉ាងល្អ ស្រស់ស្អាតទន់ភ្លន់ និង មានអំណាចខ្លាំង។
ស្របពេលបវរកញ្ញា ហ្វីយ៉ាតា ឡើងប្រកួតលើឆាកអន្តរជាតិ ក្នុងវគ្គបង្ហាញឈុតតំណាងជាតិនេះដែរ ក្រឡេកមើលបវរកញ្ញា អ៊ិន លក្ខិណា និង អ្នកគ្រប់គ្រងស្ថាប័ន MUC ព្រមទាំងក្រុមការងារប៉ុន្មានរូប ដែលបានទៅគាំទ្រលើកទឹកចិត្តដោយផ្ទាល់ដល់ប្រទេសថៃនោះ ក៏បានឃើញបង្ហាញសកម្មភាពចូលរួមអង្គុយស្រែកហ៊ោនៅមុខឆាក MU គាំទ្រដល់ការដើរបង្ហាញសមត្ថភាពរបស់អ្នកនាង ហ្វីយ៉ាតា ពេញដោយក្ដីរំភើប និង ផ្ដល់កម្លាំងចិត្តយ៉ាងកក់ក្ដៅចំពោះរូបនាង៕
សូមចុចទីនេះដើម្បីទស្សនាវីដេអូ៖
