ថ្មីៗនេះ នៅប្រទេសថៃ មានករណីបុរសជាវិស្វករគីមីមួយរូប ដែលបែកគំនិតបង្កើតរូបមន្តគ្រឿងញៀនលាយកញ្ឆា ហើយសំងំជក់តែម្នាក់ឯង រហូតបែកសតិ និង ត្រូវប្រពន្ធហៅប៉ូលិសមកចាប់។
តាមព័ត៌មានបានឱ្យដឹងថា ហេតុការណ៍ខាងលើបានកើតឡើងនៅខេត្តក្រាក់ប៊ី ដោយបុរសខាងលើជាជនជាតិអាល្លឺម៉ង់ វ័យ ៣៧ ឆ្នាំ មានប្រពន្ធជាជនជាតិថៃវ័យ ៣៣ ឆ្នាំ។ តាមរយៈស្រ្តីជាប្រពន្ធបានឱ្យដឹងថា ប្តីរបស់ខ្លួនគឺជាវិស្វករគីមីមួយរូប ដែលចូលចិត្តជក់កញ្ឆាជាប្រចាំ ហើយតែងតែគិតរូបមន្តថ្មីជក់តែម្នាក់ឯងរហូត។ ចុងក្រោយនេះ គេបានផលិតសារធាតុ Dimethyltryptamine លាយជាមួយនឹងកញ្ឆា ហើយជក់តែម្នាក់ឯង រហូតបែកសតិឃើញនេះឃើញនោះ ពេលខ្លះក៏ឃើញដល់ព្រះពុទ្ធ ពេលខ្លះក៏ឃើញគេមកធ្វើបាប ហើយស្រែកឡូឡារករឿង ដល់ថ្នាក់នាងទ្រាំលែងបាន ទើបដាច់ចិត្តហៅប៉ូលិសមកជួយអន្តរាគមន៍។
យ៉ាងណាមិញ ខាងប៉ូលិសបានចុះមកអន្តរាគមន៍ដល់ផ្ទះ ហើយបានសហការគ្នាព្យាយាមលួងលោម និង ចាប់បុរសខាងលើនេះបានសម្រេច រួចក៏បានបញ្ជូនទៅមន្ទីរពេទ្យដើម្បីធ្វើការព្យាបាល៕
ប្រភព៖ AMARINTV
