វណ្ណដា មិនដែលបង្ហាញ តែកូនប្រុសលោកតា គង់ ណៃ ទម្លាយថា តារារ៉េបរូបនេះបានជួយដល់គ្រួសារលោកជាច្រើន

ជាការពិតណាស់ កន្លងមកអ្នកគាំទ្រតារាចម្រៀងរ៉េប វណ្ណដា ច្បាស់ជាបានជ្រាបមកហើយ ពីការគោរព ស្រឡាញ់ ដល់ព្រឹទ្ធាចារ្យកោសល្យវោហារ គង់ ណៃ តាំងពីលោកតានៅមានជីវិត រហូតលាកចាកលោកទៅ វណ្ណដា ក៏នៅតែគោរព ស្រឡាញ់ជានិច្ច។ ម្យ៉ាងវិញទៀត មិនថាតែលោកតា គង់ ណៃ នោះឡើយ សូម្បីតែភរិយាលោកតា គឺលោកយាយ តាត ឆេន និង កូនៗរបស់លោកតា ក៏តារាចម្រៀងរ៉េប វណ្ណដា គោរពស្រឡាញ់ដូចគ្នា។

ជាក់ស្តែង កាលពីថ្ងៃទី ១៧ ខែឧសភា ឆ្នាំ ២០២៥ កន្លងទៅ នៅក្នុងការប្រគំតន្ត្រីទោល «ត្រីវិស័យ សុវណ្ណភូមិ» វណ្ណដា និង ផលិតកម្មបារមី ក៏បានអញ្ជើញក្រុមគ្រួសាររបស់លោកតា គង់ ណៃ ទៅចូលរួមទស្សនាយ៉ាងពិសេសផងដែរ។ ក្នុងនោះ ក្នុងការសម្តែងនៅលើឆាក វណ្ណដា ក៏បានបង្ហាញការភារវកិច្ចដល់ លោកយាយ តាត ឆេន និង រំឭកដល់លោកតា គង់ ណៃ ដូចគ្នា។

ដោយឡែក ក្រោយការប្រគំតន្ត្រីបានបញ្ចប់ កូនប្រុសរបស់លោកតា គង់ ណៃ គឺលោក គង់ សម័យ ក៏បានបង្ហោះសារបង្ហាញពីទឹកចិត្តរបស់ វណ្ណដា ទៅកាន់ក្រុមគ្រួសាររបស់លោកថា៖ «ក្នុងនាមខ្ញុំ ត្រូវជាកូនលោកពុក គង់ ណៃ សូមថ្លែងអំណរគុណដល់ប្អូន វណ្ណដា Baramey Production ដែលបានជួយគ្រួរសារខ្ញុំកន្លងមក»។

សារបង្ហោះឡើង ពីកូនប្រុសលោកតា គង់ ណៃ នេះដែរ សបញ្ជាក់ពីទំហំនៃការដឹងគុណ គោរពស្រឡាញ់របស់ វណ្ណដា និង ផលិតកម្មបារមីទៅកាន់ក្រុមគ្រួសារលោកតា គង់ ណៃ រាល់ពេលកន្លងមក៕