ជាការពិតណាស់ Album ចម្រៀងទី ៣ របស់តារាចម្រៀងរ៉េប វណ្ណដា ដែលមានឈ្មោះថា «Trey Visai» បានបញ្ចេញផ្នែកទី ១ និង ទី ២ រួចរាល់ហើយ ខណៈផ្នែកទី ៣ នឹងត្រៀមបង្ហាញក្នុងពេលឆាប់ៗខាងមុខនេះ។
យ៉ាងណាមិញ អ្វីដែលកាន់តែពិសេសសម្រាប់ផ្នែកទី ៣ នៃ Album «Trey Visai» នេះដែរ កាលពីថ្ងៃទី ១១ ខែឧសភា ឆ្នាំ ២០២៥ កន្លងទៅ តារាចម្រៀងរ៉េប វណ្ណដា បានបង្ហើបពីការផលិតចម្រៀង «Time To Rise 2» ដែលជាបទអ្នកគាំទ្ររង់ចាំជាយូរណាស់មកហើយ។ ក្នុងនោះ អ្វីកាន់តែមិនអាចឱ្យអ្នកគាំទ្ររង់ចាំទៀតបាន វណ្ណដា បានឱ្យដឹងថា «Time To Rise 2» មិនមែនចេញតែមួយបទ គឺចេញជា Album តែម្តង។
តាមរយៈសំណេររបស់ វណ្ណដា បានរៀបរាប់ថា៖ «ខ្ញុំនៅចាំសន្យារបស់ខ្ញុំ ថានឹងផលិតបទចម្រៀង Time To Rise 2។ ខ្ញុំសូមអរគុណដល់ការគាំទ្រ និង ផ្តល់ក្តីស្រលាញ់យ៉ាងធំធេងចំពោះបទ «Time To Rise» ពិសេសផ្តល់ការគោរព និង កិត្តិយសដ៏ខ្ពង់ខ្ពស់ជូនទៅកាន់លោកគ្រូព្រឹទ្ធាចារ្យ គង់ ណៃ នៃយើងគ្រប់គ្នា។ តាមពិតទៅ ខ្ញុំបានគិត និង ផលិតមិនមែនត្រឹមតែមួយបទនោះទេសម្រាប់ «Time To Rise 2» ផ្ទុយទៅវិញនោះ ខ្ញុំបានបំបែក Time To Rise 2 ទៅជាមួយ album តែម្តង ដែលអត្ថន័យ និង អត្ថរស ឆ្លុះបញ្ចាំងពីការយល់បន្ថែមពីពាក្យថា Time To Rise ក្នុងនោះមានបទចម្រៀង «អាត្មា» ជាឧទាហរណ៍ និង មានអាល់ប៊ុមឈ្មោះថា ត្រីវិស័យទី៣ «វិលត្រលប់ទៅសុវណ្ណភូមិ-TREYVISAI lll “RETURN TO SOVANNAPHUM»។
ទន្ទឹមនឹងនោះដែរ សំឡេង អារម្មណ៍ និង អត្ថន័យដែលខ្ញុំបានបញ្ចូល ទៅក្នុងអាល់ប៊ុមនេះ គឺខ្ញុំផ្តោតទៅលើវប្បធម៌ និង សិល្បៈខ្មែរដ៏ផូរផង់ ដែលដូនតាយើងបានបន្សល់ទុកឱ្យ។ ខ្ញុំ និងបារមី បានគិតថា បើគ្មានវត្តមានលោកតា ពួកយើងនឹងមិនដាក់ឈ្មោះចម្រៀង ឬ album ថា Time To Rise 2 ទេ ព្រោះគ្មានអ្វីមកជំនួសគាត់បានឡើយ។ កិត្តិនាមលោកតា នឹងរស់នៅក្នុងចិត្ត កូនចៅជារៀងរហូតជាមួយបទ «Time To Rise» ដែលជាស្នាដៃមិនអាចបំភ្លេចបាន រួមនឹងស្នាដៃ ជាច្រើនទៀតដែលលោកគ្រូព្រឹទ្ធាចារ្យ បានបន្សល់ទុកសម្រាប់កូនចៅខ្មែរជំនាន់ក្រោយ។
ក្នុងពេលឆាប់ៗនេះ ជំនួសឱ្យ Time To Rise 2 ខ្ញុំនឹងមានវីដេអូចម្រៀងផ្លូវការឈ្មោះ «សុវណ្ណភូមិ» ដែលនឹងចេញនៅថ្ងៃទី ១៣ ខែឧសភា ឆ្នាំ២០២៥។ នេះជា Music Video ដ៏ធំបំផុតរបស់ខ្ញុំក្នុងឆ្នាំនេះ ហើយខ្ញុំសង្ឃឹមថាអ្នកទាំងអស់គ្នានឹងចូលចិត្តគាំទ្រ»៕
