អ្នកគាំទ្រវិស័យបវរកញ្ញាក្នុងប្រទេសកម្ពុជា ជាពិសេសកម្មវិធី Miss Cosmo Cambodia ច្បាស់ជាបានជ្រាបមកហើយ កាលពីថ្ងៃទី ២០ ខែមករា ឆ្នាំ ២០២៥ កន្លងទៅ កម្មវិធីខាងលើបានរៀបចំសន្និសីទសារព័ត៌មាន និង ប្រកាសជាផ្លូវការនូវ National Director ថ្មីរបស់ប្រទេសកម្ពុជា។
ក្នុងកម្មវិធីខាងលើនោះដែរ ក្រៅពីការចូលរួមពីភ្ញៀវជាតិហើយនោះ ក៏មានការយាង និង ចូលរួមជាកិត្តិយសពីសំណាក់ ព្រះនាងតូច នរោត្តម ចេនណា ជា ឯកអគ្គរាជទូតកិត្តិយសនៃ Miss Cosmo Cambodia 2025 និង CEO Miss Cosmo លោក Tran Viet Bao Haong ព្រមទាំង Miss Cosmo International 2024 កញ្ញា KETUT PERMATA JULIASTRID ក៏ដូចជា កញ្ញា អ៊ិន លក្ខិណា Miss Cosmo Cambodia 2024 ផងដែរ។
ម្យ៉ាងវិញទៀត ក្រោយពីកម្មវិធីសន្និសីទសារព័ត៌មានបានបញ្ចប់ក្នុងនាមម្ចាស់ផ្ទះនោះ កញ្ញា អ៊ិន លក្ខិណា និង National Director Miss Cosmo Cambodia ក៏បាននាំ CEO Miss Cosmo និង Miss Cosmo International 2024 ទស្សនកិច្ចនៅតំបន់ជាច្រើនក្នុងរាជធានីភ្នំពេញ ក៏ដូចជាថតរូបបែបប្រពៃណី និង មានទាំងគ្រងឈុតអប្សរាទៀតផង។
ជាការពិត ក្រោយថតឈុតអប្សរាអស់រយៈពេលកន្លះខែកន្លងមក ថ្មីៗនេះ រូបភាពគ្រងឈុតអប្សរារបស់ ព្រះនាងតូច នរោត្តម ចេនណា ឯកអគ្គរាជទូតកិត្តិយសនៃ Miss Cosmo Cambodia 2025 និង កញ្ញា អ៊ិន លក្ខិណា Miss Cosmo Cambodia 2024 ព្រមទាំង Miss Cosmo International 2024 កញ្ញា KETUT PERMATA JULIASTRID បានចេញផ្លូវការហើយ ដោយផ្ទុះការចែករំលែកយ៉ាងខ្លាំង។
ក្នុងនោះ អ្នកលេងបណ្តាញសង្គមទាំងក្នុង និង ក្រៅប្រទេសបានសរសើររូបសម្រស់របស់ព្រះនាងតូច និង បវរកញ្ញាទាំង ២ រូប ក្នុងរូបភាពគ្រងឈុតអប្សរា មើលទៅល្អល្អះប្រៀបដូចរូបគំនូរ៕
រូបភាព៖ Miss Cosmo
