ល្បីរឿងបាញ់លុយ ១ ម៉ឺនរៀល ផ្សងសំណាងយកឡាន! សេង មង្គល ផុសសារផ្ទួនៗថាសេដ្ឋកិច្ចកំពុងយ៉ាប់ ឱ្យអ្នកបាញ់លុយគួរពិចារណា

ថ្មីៗនេះ អ្នកលេងបណ្តាញសង្គមហ្វេសប៊ុកបាន និង កំពុងផ្ទុះការចាប់អារម្មណ៍ និង វែកញែកជាហូរហែនៅការបង្ហោះមួយ ដែលបានប្រកាសលក់ឡានមួយគ្រឿងក្នុងតម្លៃ ១ ម៉ឺនរៀល ដោយអ្នកចង់ទិញតម្រូវឱ្យបាញ់លុយទៅមុន ដើម្បីយកឈ្មោះចាប់ឆ្នោតយកឡាន តែពេលនេះវីដេអូដើមរបស់ម្ចាស់គណនីនោះ បានលុបចេញពីផេកវិញបាត់ទៅហើយ។

យ៉ាងណាជុំវិញករណីខាងលើ គេបានឃើញតារាសម្តែង សេង មង្គល បានបង្ហោះសារ ២ ផ្ទួនៗគ្នា​ ដើម្បីឱ្យមហាជនពិរចារណា ដោយសារទី ១ លោកបានរៀបរាប់ថា៖ «សេដ្ឋកិច្ចកំពុងតែយ៉ាប់ លុយកំពុងតែពិបាករក មកឆោតរឿងបាញ់លុយ ១០០០០ រៀល ចាប់ឆ្នោតចង់បានឡានតម្លៃ ៨៥០០០ $ អនិច្ចាអ្នកបាញ់លុយ»។

មិនប៉ុន្មាននាទីក្រោយមក លោក សេង មង្គល បានបង្ហោះសារថ្មីមួយទៀតមានអត្ថន័យថា៖ «ខ្ញុំឱ្យយោបល់ទៅកាន់ប្អូនស្រីប្រសិនបើប្អូនចង់ឱ្យឡានប្អូនទៅកាន់បងប្អូនខ្សត់ខ្សោយប្រើមែន គួរតែប្រើវិធីសាស្រ្តនេះវិញ ទាហរណ៍ថា: ឡានប្អូន ៨៥០០០$ ដូច្នេះប្អូនទទួលលុយពីអ្នកបាញ់មកត្រឹមតែ ៨៥០០០$ នឹងបានហើយកុំឱ្យលើស។ បន្ទាប់មកធ្វើការចាប់ឆ្នោតផ្សងសំណាងធ្វើបែបនេះប្រាកដណាស់ បងប្អូនគាត់មិនស្តីថាឱ្យប្អូនទេ។ បញ្ជាក់: ម្នាក់បាញ់បានតែម្តង (ទើប Fair) ហើយលុយទទួលបានត្រូវបង្ហាញ ងាយៗស្រួលយល់ ហើយនេះទើបហៅថា ការជួយដោយមិនគិតពីប្រយោជន៍»៕