ថ្មីៗនេះ គ្រាន់តែ វណ្ណដា ទម្លាក់បទ MV ថ្មី ចំណងជើង «សុវណ្ណភូមិ(Golden Land)» មហាជនទាំងជាតិ និង អន្តរជាតិ បានផ្ទុះការចាប់អារម្មណ៍ខ្លាំង ដោយទទួលបានការទស្សនារហូតដល់ទៅ ១ លានទស្សនា ក្នុងរយៈពេលត្រឹមតែ ២១ ម៉ោងនៅលើ YouTube។
ក្នុង MV ថ្មីនេះ ពីមួយប្លង់ទៅមួយប្លង់បានបង្ហាញសាច់រឿងដ៏ជក់ចិត្ត ជាពិសេស បានផ្សារភ្ជាប់ជាមួយសិល្បៈ ចម្លាក់ វប្បធម៌ និង អ្វីដែលជាអត្តសញ្ញាណខ្មែរ។ សូម្បី តែការស្លៀកពាក់របស់ វណ្ណដា នៅក្នុង MV ក៏មើលមកបែបច្នៃប្រឌិត លាយឡំហ្វេហ្សិនផង និង គ្រឿងបុរាណផង ពោលស្ទីលឡូយបែបសហសម័យ។
សម្រាប់ឈុតសម្លៀកបំពាក់ដែល វណ្ណដា ពាក់នៅក្នុងបទថ្មីនេះ គឺត្រូវបានច្នៃឡើងដោយកូនខ្មែរសង្ហាពីររូប សុទ្ធសឹងជាអ្នកច្នៃម៉ូដល្បីល្បាញនៅក្នុងវិស័យហ្វេហ្សិននៅកម្ពុជាគឺ លោក KWANX និង លោក យុន រតនៈ។
អ្នកច្នៃម៉ូដទាំងពីរបានច្នៃទៅលើផ្នែកផ្សេងគ្នា ជាក់ស្តែង សម្រាប់សម្លៀកបំពាក់មួយតួខ្លួន ត្រូវបានច្នៃម៉ូដដោយ KWANX ដែលគេស្គាល់ថា ជាស្ថាបនិកប្រ៊េនសម្លៀកបំពាក់ SKOOLER JAMSTER ។ អ្នកច្នៃម៉ូដរូបនេះ បានបញ្ចប់ការសិក្សាពីមហាវិទ្យាល័យច្នៃម៉ូដ Fashion Institute of Design & Merchandising ឬហៅកាត់ថា FIDM នៅទីក្រុងឡូសអេនជឺលេស រដ្ឋកាលីហ្វ័រញ៉ា សហរដ្ឋអាមេរិក។
ចំណែកគ្រឿងលម្អលើសម្លៀកបំពាក់ ជាខ្សែក្រវាត់មាស ជាការច្នៃម៉ូដដោយ លោក យុន រតនៈ ដែលគេស្គាល់ថា ជាអ្នកច្នៃម៉ូដដ៏ល្បី និង បទពិសោធច្រើនឆ្នាំ ហើយក៏ជាស្ថាបនិកប្រ៊េនសម្លៀកបំពាក់ ROTTANAK official និង Foc Man ផងដែរ៕
