ថ្មីៗនេះ លោក Chatchai Kittichai ដែលជាម្ចាស់ធុរកិច្ចផ្សារណាត់នៅក្នុងប្រទេសថៃ បានទម្លាយពីរឿងដ៏គួរឱ្យហួសចិត្តមួយ ដែលមានអ្នកលក់ដូរយកសាច់ជ្រូកទៅលាបពណ៌បន្លំឱ្យដូចសាច់គោ ហើយលក់បោកប្រាស់អ្នកទិញ។
Chatchai Kittichai បានឱ្យដឹងថា លោកទទួលបានព័ត៌មានថាមានអាជីវករមួយចំនួននៅក្នុងផ្សារខ្លងធុមបាងប៉ាហាន់ ស្រុកបាងប៉ាហាន់ ខេត្តអយុធ្យា បានយកសាច់ជ្រូកទៅលាបពណ៌ឱ្យដូចជាសាច់គោ ហើយបន្លំលក់ឱ្យអតិថិជន ដោយកុហកថាជាសាច់គោ។ ក្នុងនោះ លោក Chatchai Kittichai បានចុះទៅផ្សារខាងលើផ្ទាល់ ហើយក៏មានការសង្ស័យទៅលើអាជីវករលក់សាច់ម្នាក់ ទើបបានយកសាច់គោដែលអាជីវករនោះលក់ទៅលាងទឹក ក៏ឃើញថាតាមពិតគឺជាសាច់ជ្រូកសោះ។
យ៉ាងណាមិញ លោក Chatchai Kittichai បានបណ្តេញអាជីវករនោះចេញពីផ្សារទៅហើយ ក្រោមករណីឆបោកអតិថិជន ដោយបិទតូបមិនឱ្យមានការលក់ដូរគ្រប់យ៉ាងតទៅទៀត ព្រមទាំងបានហៅប៉ូលិសមកជួយស៊ើបអង្កេតទៀតផង៕
ប្រភព៖ Khaosod
