ល្ងាចនេះ កម្មវិធី «Run By Heart» មានរៀបចំការតាំងពិព័រណ៍ស្នាដៃគំនូរកុមារអូទីហ្សឹម និង ការប្រគំតន្ត្រីនៅ CJCC

កម្មវិធី «រត់ដោយបេះដូង-RUN BY HEART» លើកទី ២ ដែលរៀបចំឡើងដោយ លោក សាយ តារាចម្រៀង Original Song និង ជាស្ថាបនិក «Run With Sai» បាន និង កំពុងដំណើរការហើយ ដោយការរត់ពីចម្ងាយ ឬ Visual Run បានចាប់ផ្តើមចាប់ពីថ្ងៃទី ០១ រហូតដល់ថ្ងៃទី ៣១ ឧសភា ឆ្នាំ ២០២៥ ខណៈកម្មវិធីពិសេស រត់ជាមួយនឹងកុមារអូទីហ្សឹម នឹងរត់នៅថ្ងៃទី ០១ ខែមិថុនា ឆ្នាំ ២០២៥ ខាងមុខនេះ នៅឯពហុកីឡាដ្ឋានជាតិអូឡាំពិក។

ដោយឡែក នៅរសៀលថ្ងៃទី ២៩ ខែឧសភា ឆ្នាំ ២០២៥ នេះ កម្មវិធី «រត់ដោយបេះដូង-RUN BY HEART» នឹងមានការរៀបចំកម្មវិធីពិសេសនៅឯមជ្ឈមណ្ឌលសហប្រតិបត្តការកម្ពុជា-ជប៉ុន (CJCC) ចាប់ពីវេលាម៉ោង ៤ រសៀល ដល់ ៧ យប់ ដោយមានការចូលរួមគូរគំនូរពីកុមារអូទីហ្សឹម និង ការប្រគំតន្ត្រីពីតារាកិត្តិយសរួមមាន លោក ខាយ, លោក ភីស៊ែន និង លោក សាយ ជាដើម។

គួរជម្រាបថា ព្រឹត្តិការណ៍ «រត់ដោយបេះដូង-RUN BY HEART» លើកទី ២ រៀបចំឡើង ក្នុងគោលបំណងរៃអង្គាសថវិកាសប្បុរសធម៌ សម្រាប់អង្គការសាលារៀនទន្សាយក្នុងបេសកកម្មថែទាំ និង បង្ហាត់បង្រៀន ទៅដល់កុមារអូទីហ្សឹម (Autism) និង លើកកម្ពស់ការថែទាំសុខភាពតាមរយៈការរត់ផងដែរ។ ក្នុងនោះ ការចុះឈ្មោះ រត់ពីចម្ងាយ ឬ Visual Run នឹងបន្តរហូតដល់អស់សំបុត្រ រីឯថវិកាដែលបានមកពីការចុះឈ្មោះ ១០០% នឹងបរិច្ចាគទៅកាន់អង្គការសាលាទន្សាយ៕