នៅថ្ងៃទី ១ ខែកក្កដា ឆ្នាំ ២០២៥ នេះ លោកស្រី Paethongtarn នាយករដ្ឋមន្រ្តីថៃ ត្រូវបានតុលាការរដ្ឋធម្មនុញ្ញសម្រេចឱ្យផ្អាកចេញពីតំណែងនាយករដ្ឋមន្រ្តីបណ្តោះអាសន្ន ហើយរង់ចាំការកាត់ក្តីទៅលើករណីដែលលោកស្រីបែកធ្លាយសារសំឡេងជាមួយនឹងសម្តេច ហ៊ុន សែន កន្លងមក។
ក្រោយលោកស្រី Paethongtarn ត្រូវបានតុលាការរដ្ឋធម្មនុញ្ញសម្រេចឱ្យផ្អាកចេញពីតំណែងនាយករដ្ឋមន្រ្តីបណ្តោះអាសន្ន ក្នុងថ្ងៃដដែលនេះបើតាមសារព័ត៌មាន Mono29 បានឱ្យដឹងថា លោក Suriya Juangroongruangkit ដែលជារដ្ឋមន្រ្តីក្រសួងសារធារណការ និង ជាឧបនាយករដ្ឋមន្រ្តីទី ២ ត្រូវបានកាន់តំណែងនាយករដ្ឋមន្រ្តីស្ដីទី។ ចំណែកឧបនាយករដ្ឋមន្រ្តីទី ១ លោក Phumtham Wechayachai មិនអាចឡើងកាន់តំណែងបាន ព្រោះតែមិនទាន់ទៅចូលសច្ចាប្រណិធានថ្វាយខ្លួនចំពោះព្រះមហាក្សត្រនៅឡើយទេ។
ដោយឡែក នៅក្នុងការកាន់តំណែងជាបណ្តោះអាសន្ននេះ លោក Suriya នឹងមានអំណាចពេញលេញទៅលើការកោះហៅកិច្ចប្រជុំគណៈរដ្ឋមន្ត្រី ការស្នើគោលនយោបាយបន្ទាន់ ការចុះហត្ថលេខាលើការតែងតាំង និង ផ្ទេរតំណែងមន្ត្រីរាជការ ព្រមទាំងការនាំគណៈរដ្ឋមន្ត្រីថ្មីចូលសច្ចាប្រណិធានថ្វាយព្រះមហាក្សត្រ នៅថ្ងៃទី៣ ខែកក្កដា ឆ្នាំ២០២៥ ខាងមុខនេះ៕
ប្រភព៖ MONO29
