នៅរសៀលថ្ងៃទី ២៥ ខែកុម្ភៈ ឆ្នាំ ២០២៥ តាមរយៈគណនីលោក ផែង វណ្ណៈ បានបញ្ជាក់ឱ្យដឹងថា ក្នុងថ្ងៃនេះលោកបានទៅអយ្យការអមសាលាដំបូងរាជធានីភ្នំពេញ ដើម្បីដកពាក្យបណ្ដឹងឈប់ប្ដឹងផ្ដល់លោក ពេជ ពិសិដ្ឋ ដែលអះអាងថាជាលោកតា ស៊ិន ស៊ីសាមុត ចាប់ជាតិ និង បានផ្ដល់ថវិកាចំនួន ២០០ ដុល្លារ ផងដែរ ព្រោះតែឃើញគាត់មានជីវភាពលំបាក ។
លោក ផែង វណ្ណៈ ដែលជាម្ចាស់ពាក្យបណ្ដឹង បានឱ្យដឹងផងដែរថា ការដកពាក្យបណ្ដឹងបានធ្វើឡេីងបន្ទាប់ពីលោក ពេជ ពិសិដ្ឋ ទទួលស្គាល់កំហុស និង បានសុំទោសលោករួចរាល់ហើយដែរ ។
លោកបានបន្តថា ៖ «ជាមួយគ្នានេះ ខ្ញុំក៏បានអប់រំណែនាំក្មួយ ក្នុងនាមជាចាស់ទុំជាងក្មួយ សូមក្មួយប្រេីប្រាស់ហ្វេសប៊ុកឱ្យបានត្រឹមត្រូវ ជាពិសេសបែងចែកឱ្យច្បាស់អំពីសិទ្ធិសេរីភាពនៃការបញ្ចេញមតិ និង បទល្មើសមានចែងក្នុងក្រមព្រហ្មទណ្ឌ ។ ការចោទប្រកាន់លាបពណ៌អ្នកណាម្នាក់មិនមែនជាសិទ្ធិសេរីភាពបញ្ចេញមតិទេ តែជាបទល្មេីសមានចែងក្នុងក្រមព្រហ្មទណ្ឌ»៕
