ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស អ្នកស្នេហាវិស័យវបរកញ្ញាកំពុងផ្ទុះការកោតសរសើរនៃឆន្ទៈក្នុងការលះបង់របស់វបរកញ្ញាកម្ពុជា កញ្ញា កុយ អេនណា ដែលបានលះបង់កម្លាំងកាយ កម្លាំងចិត្តក្នុងការជួយដល់សង្គមក្នុងបេសកកម្មនៃដំណើរថ្មើរជើងរបស់នាងពីទីក្រុងភ្នំពេញ ទៅកាន់ខេត្តសៀមរាប។
ជាការពិតណាស់ ការលះបង់ជួយដល់ការងារសង្គមពីបវរកញ្ញាកម្ពុជា មិនមែនមានតែកញ្ញា កុយ អេនណា តែម្នាក់នោះទេ ពោលគឺកន្លងមកក៏មានបវរកញ្ញាជាច្រើនបានចូលរួមទៅតាមសកម្មភាពនានារបស់ខ្លួន ប៉ុន្តែសម្រាប់កញ្ញា កុយ អេនណា បាន និង កំពុងឆក់យកបេះដូងប្រជាជនជាច្រើន ព្រោះនាងគឺជាស្ត្រីដំបូងបានដើរក្នុងរយៈចម្ងាយជាង ៣០០ គីឡូម៉ែត្រដើម្បីសង្គម។
ដំណើរនៃការដើរថ្មើរជើងរបស់កញ្ញា កុយ អេនណា គឺបានចាប់ផ្តើមតាំងពីថ្ងៃទី ០៤ ខែកញ្ញា ឆ្នាំ ២០២៥ មកម្ល៉េះ ហើយការបញ្ចប់នៅមិនទាន់ជាក់លាក់នៅឡើយ ពោលគឺកំណត់ទៅតាមពេលវេលាជាក់ស្តែងនៃការដើររបស់នាង។ ក្នុងនោះ ដំណើរថ្មើរជើងនេះ កញ្ញា កុយ អេនណា ធ្វើឡើងក្នុងគោលបំណង ២ គឺ ដើម្បីរៃអង្គាសថវិកាសប្បុរសធម៌ ជួយគាំទ្រដល់ក្មេងៗ ឬជនពិការក្នុងមណ្ឌលខ្វះខាតនៅកម្ពុជា និង ដើម្បីចូលរួមចំណែកផ្សព្វផ្សាយពីការធ្វើដំណើរទេសចរណ៍ពីរាជធានីភ្នំពេញឆ្ពោះទៅកាន់ទឹកដីសៀមរាបផងដែរ។
ឆន្ទៈដ៏មោះមុតរបស់បវរកញ្ញា កុយ អេនណា ក៏បានធ្វើឱ្យលោក ជំទាវ ញ៉ែម មរកត រដ្ឋលេខាធិការក្រសួងកិច្ចការនារី ក៏បានបង្ហាញការកោតសរសើរដល់កញ្ញា កុយ អេនណា ថា៖ «ខ្ញុំសូមកោតសរសើរប្អូនស្រី ជាកញ្ញាឯកដែលមានសម្រស់ស្អាត កំពុងពេញស្រឡាញ់ខ្លួន ប៉ុន្តែបែរជាលះបង់ការថែរក្សាសម្រស់ ដើរហាលក្តៅ ហាលភ្លៀង មិនខ្លាចគ្រោះថ្នាក់ទាំងចរាចរណ៍ ទាំងសុវត្ថិភាព។ ប្អូនធ្វើដំណើរដោយថ្មើរជើង ពីភ្នំពេញទៅគោលដៅខេត្តសៀមរាប មិនមែនសម្តែងទេ មិនមែនធម្មតាសម្រាប់ស្ត្រី តែជាការប្តេជ្ញាចិត្តដ៏មោះមុតដើម្បីសម្រេចគោលដៅ។ ខ្ញុំកំពុងមើល កំពុងដើរជាមួយប្អូន កំពុងលើកទឹកចិត្ត ហើយយើងខ្ញុំ និង ក្រុមស្ត្រី បើកបររ៉ឺម៉កទេសចរណ៍ជាច្រើន នឹងរង់ចាំស្វាគមន៍ត្រៀមដើរជាមួយប្អូន ពេលប្អូនទៅដល់រង្វង់មូលផ្ការំដួលក្នុងខេត្តមរាប !! តស៊ូៗៗ!!»៕
