លោកជំទាវបណ្ឌិត ពេជ ចន្ទមុន្នី លើកទឹកចិត្តដល់ ហេង វិសាល និង ស្រីនា ក្រោយរងការចោទប្រកាន់រឿងកិបកេងមូលនិធិ

ជុំវិញការធ្វើមូលនិធិសប្បុរសធម៌របស់លោក ហេង វិសាល និង ជា ស្រីនា បន្ទាប់ពីខ្នះខ្នែងជួយការងារជាតិយ៉ាងសកម្មរយៈពេល ២ សប្ដាហ៍ មកដល់ថ្មីៗនេះ ប្ដីប្រពន្ធមួយគូនេះ បានបង្ហាញការខកខិត្ត និង អស់ទឹកចិត្តខ្លាំង ក្រោយរងនូវការវែកញែកពីមហាជនមួយចំនួន ដែលបានចោទប្រកាន់លើការចាត់ចែងមូលនិធិ ថែមទាំងមានពាក្យថាឱ្យអ្នកទាំងពីររឿងលួចស្បៀងទៀតផង។

បន្ទាប់ពីរងនូវពាក្យពេចន៍វែកញែកពីអ្នកលេងបណ្ដាញសង្គមមួយចំនួននេះ បានធ្វើឱ្យលោក ហេង វិសាល និង ជា ស្រីនា បង្ហោះវីដេអូ និង សារ និយាយបកស្រាយបន្តបន្ទាប់ជាមួយនឹងអារម្មណ៍បាក់ទឹកចិត្ត និង អស់សង្ឃឹម រហូតពោលពាក្យខ្លាចរាងចាលហើយទៀតផង។

ស្របពេលឃើញបែបនេះដែរ លើបណ្ដាញសង្គមមហាជនអ្នកគាំទ្រ អ្នកសិល្បៈ និង បុគ្គលល្បីៗជាច្រើន ក៏បានចែករំលែកចូលរួមលើកទឹកចិត្ត និង បង្ហាញការអរគុណដោយក្ដីទុកចិត្តចំពោះលោក ហេង វិសាល និង ស្រីនា ដែលចង់ឱ្យអ្នកទាំងពីរបន្តសកម្មភាពជួយសង្គមបន្តទៀត។

ក្នុងនោះ ក៏បានឃើញហ្វេសប៊ុកផេករបស់ស្ត្រីទី ១ នៃកម្ពុជា គឺលោកជំទាវបណ្ឌិត ពេជ ចន្ទមុន្នី បានចូលរួមបញ្ចេញមតិក្នុងការបង្ហោះរបស់លោក ហេង វិសាល ដែលលោកជំទាវបណ្ឌិត បានថ្លែងអរគុណ និង លើកទឹកចិត្តដល់លោក ហេង វិសាល និង ភរិយា ឱ្យបន្តសកម្មភាពជួយជនរងគ្រោះបន្តទៀតផងដែរ។

សារនោះ លោកជំទាវបណ្ឌិត ពេជ ចន្ទមុន្នី បានមានប្រសាសន៍ទៅកាន់លោក ហេង វិសាល ថា ៖ «ជាដំបូងសូមអរគុណប្អូនប្រុសដែលបានផ្តួចផ្តើមគំនិតក្នុងការជួយដល់ជនដែលរងគ្រោះក្នុងពេលនេះ។ បងសូមលើកទឹកចិត្តប្អូនឱ្យបន្តការងារនេះទៀត។ បងគាំទ្រសកម្មភាពរបស់ប្អូនៗ។ ប្អូនត្រូវចងចាំថា ការធ្វើអំពើល្អមិនរង់ចាំការតបស្នងមកវិញ។ យើងមិនអាចឃាត់មាត់អ្នកដទៃបានទេ ដូច្នេះកុំឱ្យពាក្យមនុស្សមួយចំនួនតូច បំផ្លាញនូវផលប្រយោជន៍ដល់មនុស្សដែលត្រូវការជាច្រើន។ keep it up for our country and for our people»៕