កាលពីថ្ងៃទី ០៩ ខែឧសភា កន្លងទៅនេះ រដ្ឋបាលចំណីអាហារ និង ឱសថអាមេរិក បានអនុម័តផ្លូវការនូវឧបករណ៍ពិនិត្យមហារីកមាត់ស្បូននៅផ្ទះ ដែលវានឹងជំនួសឱ្យឧបករណ៍ចាស់នៃការធ្វើតេស្តពិនិត្យរកកោសិកាមហារីកមាត់ស្បូន Pap smear។
ឧបករណ៍ថ្មីនេះ ត្រូវបានបង្កើតឡើងដោយក្រុមហ៊ុន Teal Health វាត្រូវបានគេឱ្យឈ្មោះថា The Teal Wand ។ វាមានរាងដូចទៅនឹងសំឡីអនាម័យបែបទំនើប Tampon ដែលអាចប្រមូលជាលិកាតូចៗពីទ្វារមាសដោយខ្លួនឯង។ ឧបករណ៍នេះនឹងដាក់លក់តាមអនឡាញសម្រាប់ស្ត្រីអាយុចាប់ពី ២៥ ឆ្នាំ ដល់ ៦៥ ឆ្នាំ ជាវ័យជាមធ្យម ដែលប្រឈមកើតជំងឺមហារីកមាត់ស្បូន។
អ្នកដែលទិញតាមអនឡាញ តម្រូវធ្វើការទូរស័ព្ទប្រឹក្សាអំពីប្រវត្តិសុខភាព ដើម្បីស្ទាបស្ទង់កម្រិតទទួលបាន បន្ទាប់មកទើបចេញវេជ្ជបញ្ជាឱ្យប្រើប្រាស់។ ក្រោយពេលធ្វើសំណាករួច អ្នកប្រើប្រាស់តម្រូវបញ្ជូនវាទៅមន្ទីរពិសោធន៍។
ជំងឺមហារីកមាត់ស្បូន ជាទូទៅវាប៉ះពាល់ដល់ផ្នែកខាងក្រោមនៃស្បូន។ វាត្រូវបានគេធ្វើរោគវិនិច្ឆ័យឃើញលើស្ត្រីប្រហែល 0.6 ភាគរយ។ ថ្វីត្បិតការចាក់វ៉ាក់សាំងការពារវីរុស Human papillomavirus (HPV) និង ការពិនិត្យទៀងទាត់មានប្រសិទ្ធភាពខ្ពស់ក្នុងការការពារជំងឺនេះក៏ដោយ ប៉ុន្តែស្ត្រីលើសពី ១ នាក់ ក្នុងចំណោម ៤ នាក់ បានធ្វើការណាត់ជួបពិភាក្សាអំពីបញ្ហានេះជាប្រចាំ។
ឧបករណ៍ The Teal Wand មានសមត្ថភាពអាចធ្វើតេស្តរកឃើញ វីរុស Human papillomavirus (HPV) ដែលជាករណីចម្បងនៃជំងឺមហារីកមាត់ស្បូន។ តាមការសាកល្បង វាផ្តល់នូវភាពងាយស្រួលជាង និង មានផាសុកភាពជាង។ ចំពោះតម្លៃវិញ ក្រុមហ៊ុនមិនទាន់បានបញ្ចេញនោះទេ ប៉ុន្តែកំពុងពិភាក្សាគ្នាដើម្បីធានាបានតម្លៃមួយដែលសមរម្យបំផុត។ ផលិតផលនេះនឹងដាក់លក់លើកដំបូងនៅក្នុងខែមិថុនាខាងមុខនេះ៕
ប្រភព៖ ST
