នាពេលថ្មីៗនេះ បេឡាជាតិសន្តិសុខសង្គម បានចែករំលែកចំណេះដឹង អំពីវិធីសាស្ត្រក្នុងការពិនិត្យមើលថា ប័ណ្ណសមាជិក ប.ស.ស. របស់លោកអ្នកមានសុពលភាព អាចប្រើប្រាស់សេវានៅតាមមូលដ្ឋានសុខាភិបាលដៃគូ ប.ស.ស។
បេឡាជាតិសន្តិសុខសង្គម បានបញ្ជាក់ឱ្យបានដឹងថា សម្រាប់សមាជិក ប.ស.ស. ដែលកំពុងបម្រើការងារនៅតាមក្រុមហ៊ុន សហគ្រាស គ្រឹះស្ថាន និង បានធ្វើប័ណ្ណ ប.ស.ស. រួចរាល់ ដើម្បីអាចប្រើប្រាស់សេវានៅតាមមូលដ្ឋានសុខាភិបាលដៃគូ ប.ស.ស. បាន គឺត្រូវបំពេញនូវលក្ខខណ្ឌដូចខាងក្រោម ៖
១. បានបង់ភាគទានយ៉ាងតិចចំនួន ២ ខែជាប់គ្នា
២. បានបង់ភាគទានចំនួន ៦ ខែក្នុងកំឡុងពេល ១២ ខែចុងក្រោយ គិតត្រឹមខែដែលមានបញ្ហាសុខភាព ឬ សម្រាកលំហែមាតុភាព
ក្នុងនោះ សម្រាប់បុគ្គលស្វ័យនិយោជន៍ ដើម្បីអាចប្រើប្រាស់សេវានៅតាមមូលដ្ឋានសុខាភិបាលដៃគូ ប.ស.ស. បានគឺត្រូវបំពេញនូវលក្ខខណ្ឌដូចខាងក្រោម ៖
១. បានចុះឈ្មោះចូលជាសមាជិក ប.ស.ស. និង មានប័ណ្ណ ប.ស.ស.
២. បានបង់ភាគទានយ៉ាងតិចចំនួន ២ ខែជាប់គ្នា
គួរឱ្យដឹងផងដែរថា លោកអ្នកអាចពិនិត្យសុពលភាពប័ណ្ណ ប.ស.ស. របស់អ្នក តាមរយៈកម្មវិធីទូរស័ព្ទដៃ ប.ស.ស. (NSSF Member) ហើយសម្រាប់ព័ត៌មានបន្ថែម អាចទំនាក់ទំនងទៅកាន់លេខ ១២៨៦ ឬ ១២៩៧៕
