សារព័ត៌មាន Business Standard បានរាយការណ៍ពីករណីរបស់ក្រុមហ៊ុនមួយនៅចិន ដែលចេញច្បាប់កាត់ប្រាក់ខែបុគ្គលិកណាដែលចូលបន្ទប់ទឹកលើសពី ២ នាទី។
ក្រុមហ៊ុនខាងលើនេះ គឺជាក្រុមហ៊ុនផលិតគ្រឿងម៉ាស៊ីន ដែលមានទីស្នាក់ការកណ្តាលនៅទីក្រុង Foshan ខេត្ត Guangdong ។ ក្រុមហ៊ុននេះបានអនុវត្តបទប្បញ្ញត្តិដ៏តឹងរ៉ឹងទាក់ទងនឹងការចូលបន្ទប់ទឹករបស់បុគ្គលិក ដោយអនុញ្ញាតឱ្យបុគ្គលិកចូលបន្ទប់ទឹកបានត្រឹមតែ ២ នាទីប៉ុណ្ណោះ ចំណែកបុគ្គលិកណាមានបញ្ហាសុខភាព ឬចាំបាច់ក្នុងការប្រើប្រាស់បន្ទប់ទឹកយូរជាងនេះ គឺត្រូវសុំការអនុញ្ញាតពីក្រុមហ៊ុនជាមុនសិន។
ក្រុមហ៊ុនបានអះអាងថា ការចេញច្បាប់នេះ គឺដើម្បីរក្សាសណ្តាប់ធ្នាប់នៅកន្លែងធ្វើការ ជាពិសេសគឺយោងតាមក្បួនវេជ្ជសាស្រ្តបុរាណ ដែលបានឱ្យដឹងថាកំណត់ពេលវេលាដើម្បីប្រើប្រាស់បន្ទប់ទឹកគឺមានប្រយោជន៍ចំពោះសុខភាព។ លើសពីនេះទៀត ខាងក្រុមហ៊ុនក៏បានដាក់កាមេរ៉ាសុវត្ថិភាពចាំមើលផងដែរ បើសិនជាបុគ្គលិកណាហ៊ានបំពានច្បាប់នេះ នោះនឹងត្រូវផាកប្រាក់ចំនួន ១០០ យ័ន ពោលគឺនឹងត្រូវកាត់ចេញពីប្រាក់ខែ៕
ប្រភព៖ Khaosod
