នៅថ្ងៃទី ៣០ ខែឧសភា ឆ្នាំ ២០២៥ ក្រសួងធម្មការ និង សាសនា បានជូនដំណឹងឱ្យបានដឹងថា ប្រធានមន្ទីរធម្មការ និង សាសនាខេត្តកណ្តាល លោក សៀក សារឿន បានសហការជាមួយអាជ្ញាធរមូលដ្ឋានក្រុងតាខ្មៅ ធ្វេីការណែនាំលោកស្រី អេន ចរិយា ជុំវិញការបង្ហោះវីដេអូសកម្មភាព និង រូបភាពធ្វេីឱ្យប៉ះពាល់ដល់សន្តិសុខសង្គម តាមបណ្តាញសង្គមនានា។
ក្នុងនោះ ប្រធានមន្ទីរធម្មការ និង សាសនាខេត្តកណ្តាល បានឱ្យបុគ្គលខាងលើធ្វេីកិច្ចសន្យាបញ្ឈប់ការបង្ហោះ លុបវីដេអូ រូបថតសកម្មភាពផ្សេងៗ មានការប្រោះព្រំជូនកងទ័ពនៅប្រាសាទតាមាន់ និង ការផ្សព្វផ្សាយនានាធ្វេីឱ្យប៉ះពាល់ប្រពៃណី ទំនៀមទម្លាប់ ព្រះពុទ្ធសាសនា សណ្តាប់ធ្នាប់សង្គម និង ភាពថ្លៃថ្នូររបស់សង្គមជាតិ ចេញពីប្រព័ន្ធបណ្តាញសង្គមទាំងអស់។
សូមរំឮកផងដែរថា កាលពីថ្ងៃទី ០២ ខែកុម្ភៈ ឆ្នាំ ២០២៥ កន្លងទៅ ក្រសួងធម្មការ និង សាសនា ក៏ធ្លាប់បានចុះណែនាំឱ្យបុគ្គលឈ្មោះ អេន ចរិយា ហៅអ្នកគ្រូលី ធ្វើកិច្ចសន្យាបញ្ឈប់សកម្មភាពរបស់ខ្លួនផងដែរ ដែលកាលនោះរូបគេបានតាំងខ្លួនជាអ្នកមានបុណ្យ ជាព្រះនាងឥន្ទ្រទេវី វីរៈក្សត្រីនាសម័យអង្គរ និង តាំងខ្លួនថា មានបារមីចូលសណ្ឋិត៕
