កាលពីថ្ងៃទី ១៦ ខែមិថុនា ឆ្នាំ ២០២៥ កន្លងទៅនេះ លោកជំទាវបណ្ឌិត ពេជ ច័ន្ទមុនី ហ៊ុន ម៉ាណែត បានរៀបចំពិធីសំណេះ សំណាលជាមួយសិល្បករ សិល្បការិនី និង បុគ្គលមានឥទ្ធិពលក្នុងបណ្តាញសង្គមជាច្រើននាឱកាសនៃយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៥។
អ្វីដែលចាប់អារម្មណ៍ អ្នកគាំទ្រក៏បានឃើញវត្តមានចូលរួមរបស់តារាប្រុសស្រី និង ថ្នាក់ដឹកនាំរបស់ផលិតកម្មបារមី ក៏បានចូលរួមក្នុងសំណេះសំណាលខាងលើ ដោយរួមមានកំពូលតារាចម្រៀងរ៉េប វណ្ណដា, លោក នរិទ្ធ, កញ្ញា រ៉េត ស៊ូហ្សាណា និង CEO ព្រមទាំងនាយកប្រតិបត្តិរបស់ផលិតកម្មបារមី កញ្ញា Laura ប្អូនប្រុស ព្រមទាំងអ្នកម្តាយផងដែរ។
ដោយឡែក មុននឹងជំនួបនៃពិធីសំណេះសំណាលជាមួយសិល្បករ សិល្បការិនី និង បុគ្គលមានឥទ្ធិពលក្នុងបណ្តាញសង្គមរវាង លោកជំទាវបណ្ឌិត ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា និង ជាអ្នកផ្តួចផ្តើមមូលនិធិនេះ តារាចម្រៀងរ៉េប វណ្ណដា ក៏បានធ្វើការចូលរួមបរិច្ចាគជូនដល់មន្ទីរពេទ្យគន្ធបុប្ផាដូចគ្នាចំនួន ១០ លានរៀន រីឯផលិតកម្មបារមីចំនួន ៤០ លានរៀល។
ម្យ៉ាងវិញទៀត ក្រោយពិធីសំណេះសំណាល ជាមួយលោកជំទាវបណ្ឌិត ពេជ ចន្ទមុន្នី ហើយនោះ តារាចម្រៀងរ៉េប វណ្ណដា និង ក្រុមការងារផលិតកម្មបារមី ក៏បានអញ្ជើញទៅកាន់មន្ទីរពេទ្យគន្ធបុប្ផាដោយផ្ទាល់ទៀតផង។
គួរជម្រាបថា យុទ្ធនាការ «១ ម៉ឺនរៀល ១ ម៉ឺននាក់» គឺមានគោលបំណងជំរុញចលនាកៀរគរថវិកាសប្បុរសធម៌ឱ្យកាន់តែផុសផុល និង សកម្មបន្ថែមទៀត ក្នុងចំណោមសិស្ស, និស្សិត, យុវជន, មន្រ្តីរាជការ, ថ្នាក់ដឹកនាំ, ពាណិជ្ជករ, សាធារណជន, ភរិយាថ្នាក់ដឹកនាំ, ម្ចាស់ក្រុមហ៊ុន-សហគ្រាស, គណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំក្រសួង-ស្ថាប័ន, រដ្ឋបាលរាជធានី-ខេត្ត និងសមាជិកសមាគមឧកញ៉ាកម្ពុជា ក្នុងមហាចលនាមនុស្សធម៌របស់ជាតិ និង ក្នុងស្មារតី «ខែ្មរជួយខ្មែរ»។ ការរៀបចំយុទ្ធនាការ «១ ម៉ឺនរៀល ១ ម៉ឺននាក់» នេះក៏ជាការចូលរួមអបអរសាទរ «ទិវាកុមារអន្តរជាតិ ១ មិថុនា» និង ដើម្បីជាការរំឭកឱ្យមានការបន្តបរិច្ចាគជូនមូលនិធិគន្ធបុប្ផាកម្ពុជា ក្នុងគោលបំណងរួមមួយគឺនាំក្តីសង្ឃឹម និងភាពញញឹមដល់ទារក និងកុមារ នៅកម្ពុជា៕
