បើនិយាយពីរឿងរ៉ាវឯកជន និង ដំណើរលើវិថីសិល្បៈខ្លះៗរបស់ អ្នកនាង មាស សុខសោភា ច្បាស់ជាមានអ្នកគាំទ្រជាច្រើនច្បាស់ជាបានជ្រាបហើយនៅក្នុងគ្រួសារ អ្នកនាង មាស សុខសោភា មិនមែនមានតែអ្នកនាងម្នាក់ទេ ដែលមានដុងជាអ្នកសិល្បៈនោះ។
អ្នកនាង មាស សុខសោភា មានបងប្រុសបង្កើត គឺលោក មាស សុខរតនៈ ក៏ជាអតីតតារាចម្រៀង និង ជាអ្នកដឹកនាំដ៏ល្បីមួយរូបផងដែរ។ លើសពីនោះ អ្នកនាង មាស សុខសោភា ក៏មានប្អូនជីដូនមួយប៉ុន្មានរូប ក៏ជាអ្នកសិល្បៈដែរ។
ដោយឡែក ងាកមកកាន់ក្មួយស្រីបង្កើតចំនួន ២ រូប របស់អ្នកនាង មាស សុខសោភា គឺកូនស្រីរបស់លោក មាស សុខរតនៈ ឯណោះវិញ បច្ចុប្បន្ន ក៏កំពុងបោះជំហានឈានជើងចូលវិថីសិល្បៈតាមលោកឪពុក និង ម្តាយមីងដូចគ្នាដែរ។ ក្នុងនោះ គឺមានកញ្ញា មាស សុខដារីនី និង កញ្ញា មាស សុខវីរីយ៉ា។
គួរជម្រាបថា លោក មាស សុខរតនៈ បងប្រុសបង្កើត អ្នកនាង មាស សុខសោភា មានកូនចំនួន ៣ នាក់ គឺប្រុស ១ នាក់ និង ស្រី ២ នាក់។ ដោយឡែក ដោយមានដុងសិល្បៈ និង ធ្លាប់បានសម្តែង MV ជាមួយនឹងម្តាយមីងកាលពីតូចៗ រហូតពេញវ័យពេលនេះ កញ្ញា មាស សុខដារីនី និង កញ្ញា មាស សុខវីរីយ៉ា ក៏បានចាប់យកជំនាញលើវិថីសិល្បៈទាំងការសម្តែង ទាំងការច្រៀង និង ការរាំរបាំបុរាណទៀតផង៕
