ក្នុងថ្ងៃ «ទិវាអ្នកម្តាយ» កាលពីថ្ងៃទី ១១ ខែឧសភា ឆ្នាំ ២០២៥ កន្លងទៅនេះ តារាចម្រៀងប្រុស លីម តិចម៉េង បានធ្វើឱ្យអ្នកគាំទ្ររំជួលចិត្ត ស្រក់ទឹកភ្នែកសឹងគ្រប់គ្នា ខណៈលោកបានរៀបរាប់ពីការលះបង់ ដើម្បីម្តាយ និង ប្អូនស្រីជាទីស្រឡាញ់។
ក្នុងនោះ តារាចម្រៀងប្រុសខាងលើ បានរៀបរាប់ទាំងអួលដើមកនៅលើឆាកប្រគំតន្ត្រី ដោយលោកទម្លាយថា កាលពីឆ្នាំមុនលោកបានបញ្ចាំប្លង់ផ្ទះដើម្បីព្យាបាលម្តាយ។
រៀបរាប់ទាំងអួលដើមក បង្ហាញពីការដឹងគុណ និង ការលះបង់អ្វីៗគ្រប់យ៉ាងដើម្បីមើលជំងឺម្តាយផង និង ប្អូនស្រីផងនោះ លោក លីម តិចម៉េង ក៏បានឱ្យដឹងថា មុនម្តាយឈឺ គឺប្អូនស្រីរបស់លោកមានជំងឺប្រចាំកាយត្រូវព្យាបាល ហើយមិនប៉ុន្មានម្តាយលោកក៏ឈឺមានជំងឺច្រើនមុខទៀត ដូច្នេះហើយ លោកត្រូវការលុយជាចាំបាច់ដើម្បីម្តាយ ទើបលោកសម្រេចបញ្ចាំប្លង់ផ្ទះដោយម្តាយមិនដឹងទេ នេះជាលើកដំបូងហើយដែលលោកទម្លាយ។
ចំពោះវីដេអូដែលលោក លីម តិចម៉េង ទម្លាយជុំវិញរឿងរ៉ាវនេះ ធ្វើឱ្យមហាជនអ្នកគាំទ្រលើបណ្ដាញសង្គមជាច្រើនផ្ទុះចែករំលែកបង្ហាញក្ដីអាណិតស្រឡាញ់ និង បារម្ភពីលោកបន្តបន្ទាប់ ថែមទាំងមានអ្នកគាំទ្រមួយចំនួនបានជួយជាថវិកាដល់តារាចម្រៀងរូបនេះទៀត។
ស្របពេលឃើញមហាជនបង្ហាញក្ដីបារម្ភ និង មានអ្នកផ្ដល់ជំនួយជាថវិកានោះ លីម តិចម៉េង ក៏បានបង្ហោះសារមួយនិយាយបកស្រាយជុំវិញវីដេអូរបស់ខ្លួន ដោយបញ្ជាក់ឱ្យដឹងថាលោកគ្រាន់តែចែករំលែកបទពិសោធន៍ និង រឿងរ៉ាវរបស់ខ្លួនប៉ុណ្ណោះ គឺលោកពុំមានបំណងសុំជំនួយពីមហាជនឡើយ។ ក្នុងនោះ លោកក៏បានបង្ហាញការអរគុណដល់ទឹកចិត្តអ្នកគាំទ្រដែលបារម្ភ និង ជួយជាថវិកា ប៉ុន្តែរូបលោកមិនអាចទទួលយកបានទេ។
សារនោះ លោក លីម តិចម៉េង បានរៀបរាប់ថា ៖ «ពុកម៉ែ បងប្អូនទាំងអស់គ្នាសូមកុំយល់ច្រឡំ វីដេអូ ការចែករំលែកបទពិសោធន៍ក្នុងកម្មវិធី ទិវាអ្នកម្តាយ កាលពីម្សិលមិញថាជាការសុំជំនួយពីពុកម៉ែ បងប្អូន ឬ fan ណាម្នាក់ឡើយ ខ្ញុំបាទបង្ហោះសំណេរនេះដោយសារមានបងប្អូន fan fan ជាច្រើនបានយល់ច្រឡំថាខ្ញុំបាទរៀបរាប់ យំកាលពីយប់ម្សិលមិញនេះ គឺដោយសារត្រូវការជំនួយ ហើយក៏មានបងប្អូន fan fan មួយចំនួនចង់ជួយ សូមបងប្អូនកុំជឿពាក្យចចាមអារ៉ាមទាំងនោះ ខ្ញុំអត់ដែលបានស្នើរសុំអ្វីពីពុកម៉ែ បងប្អូន ឬ fan fanណាម្នាក់ទេ ត្រឹមតែការស្រឡាញ់ ចូលចិត្ត គាំទ្រ ពីពុកម៉ែ បងប្អូនទាំងអស់គ្នា គឺគ្រប់គ្រាន់ជាកម្លាំងចិត្តសម្រាប់ខ្ញុំណាស់ទៅហើយ សូមអរគុណ», «លុយមិនងាយរកទេពុកម៉ែ បងប្អូនទាំងអស់គ្នា តែក៏អរគុណណាស់សម្រាប់ក្តីបារម្ភ ហើយក៏សុំទោសដែលខ្ញុំបាទមិនបានទទួល»៕
សូមចុចទីនេះ ដើម្បីទស្សនាវីដេអូ៖
