បន្ទាប់ពីជួបនូវគ្រោះអកុសលនឹកស្មានមិនដល់របស់តារាចម្រៀងរ៉េបល្បីឈ្មោះ លោក RuthKo ដែលបានទទួលបាត់បង់ជីវិតក្នុងគ្រោះថ្នាក់ចរាចរណ៍កាលពីយប់រំលងអធ្រាត្រថ្ងៃទី ០៦ ខែមករា ឆ្នាំ ២០២៥ កន្លងទៅ នៅតែដិតដាម បន្សល់នូវការសោកស្តាយ និង ទទួលយកមិនទាន់បានពីសំណាក់ក្រុមគ្រួសារ មិត្តភក្តិ និង អ្នកគាំទ្រ។
ទន្ទឹមគ្នាក្នុងការបាត់បង់កូនល្អ ប្អូនល្អ បងល្អ និង មិត្តជាទីស្រឡាញ់នេះ នៅក្នុងបណ្តាញសង្គមហ្វេសប៊ុកបានឃើញសិល្បករ សិល្បការិនី ជាពិសេស តារាក្នុងវិស័យចម្រៀងរ៉េប និង R&B បានប្តូរ Profile Photo លើហ្វេសប៊ុក ទៅជារូបនិមិត្តសញ្ញាឈ្មោះរបស់លោក RuthKo ដើម្បីកាន់ទុក្ខដល់លោកទៀតផង។
យ៉ាងណាមិញ នៅព្រឹកថ្ងៃទី ០៨ ខែមករា ឆ្នាំ ២០២៥ នេះ រូបកាយរបស់លោក RuthKo ត្រូវបានរលត់ទៅតាមផ្សែងខ្មួលខ្មាញ់ បន្សល់ទុកនៅតែអនុស្សាវរីយ៍ ស្នាមញញឹមនៅលើរូបថត និង ស្នាដៃរបស់លោកតែប៉ុណ្ណោះ ដោយពិធីបូជាសពរបស់លោក ដាវិឌ ប្ញទ្ធិរុទ្រ ហៅ RuthKo ត្រូវបានផ្លាស់ប្តូរពីពេលរសៀល មកបូជានៅវេលាម៉ោង ៨-៩ ព្រឹកនេះ។
ដោយឡែក សម្រាប់កម្មវិធី ៧ ថ្ងៃ របស់តារាចម្រៀងរ៉េបល្បីឈ្មោះ RuthKo នឹងត្រូវប្រារព្ធធ្វើនៅពេលព្រឹកថ្ងៃ ១២ ខែមករា ឆ្នាំ ២០២៥ ខាងមុខនេះ នៅគេហដ្ឋានរបស់សព នៅផ្ទះលេខ ៥១ ផ្លូវ ១៦៨ ភូមិទួលរការ ១ សង្កាត់ចាក់អង្រែក្រោម ខណ្ឌមានជ័យ រាធានីភ្នំពេញ៕
