ជាការពិតណាស់ បើទោះជាមិនបានបង្ហាញវត្តមានលើវិស័យសិល្បៈទាំងស្រុងដូចពីមុនក៏ពិតមែន តែអតីតគូស្វាមីភរិយាអ្នកសិល្បៈ ជំទាវ លី ឈី និង ស្វាមី ឧកញ៉ា ប៊ុន រតនា នៅតែបន្តបង្ហាញពីអរិយធម៌ វប្បធម៌ខ្មែរ និង រឿងអប់រំជារឿយៗនៅលើបណ្តាញសង្គមនានា។ ក្នុងនោះ អតីតារាស្រី ជំទាវ លី ឈី និង អតីតអ្នកដឹកនាំល្បី ឧកញ៉ា ប៊ុន រតនា ធ្លាប់បានផលិតរឿងអប់រំ និង វីដេអូបង្ហាញពីវប្បធម៌ អរិយធម៌ខ្មែរថែមទៀតផង។
ដោយឡែក ងាកមកកាន់ជីវិតអាពាហ៍ពិពាហ៍ឯណោះវិញ ក្រោយពីចាប់ដៃគ្នារៀបការសាងគ្រួសារអស់រយៈពេល ៦ ឆ្នាំ ហើយនោះជំទាវ លី ឈី និង ឧកញ៉ា ប៊ុន រតនា ក៏ត្រូវបានមហាជនចាប់ក្រសែភ្នែកមើលរបស់អតីតអ្នកសិល្បៈមួយគូនេះ ក៏ព្រោះតែដូចពាក្យចាស់ពោលថា «សំណាបយោងដី ស្រីយោងប្រុស» ដោយគេឃើញគូស្វាមីភរិយាមួយគូនេះស្រុះដៃគ្នាប្រឹងរកស៊ី បើកមុខជំនួយជាបន្តបន្ទាប់។
លើសពីនោះ បើគិតមកដល់ពេលនេះ ជំទាវ លី ឈី និង ឧកញ៉ា ប៊ុន រតនា ក៏ទទួលបានចំណងដៃកូនស្រីច្បងអាយុ ៥ ឆ្នាំ និង កូនប្រុសទីពីរ អាយុ ៣ ឆ្នាំ ព្រមទាំងកំពុងពពោះកូនទី ៣ ក្នុងផ្ទៃ និង ត្រៀមទទួលស្វាគមន៍នៅក្នុងឆ្នាំ ២០២៥ នេះ។
ស្របពេលសមាជិកថ្មីមកដល់ កាលពីថ្ងសទី ២១ ខែឧសភា ឆ្នាំ ២០២៥ កន្លងទៅនេះ ជំទាវ លីឈី និង ឧកញ៉ា ប៊ុន រតនា ក៏បានរៀបចំពិធីឡើងគេហដ្ឋានថ្មីធំស្កឹមស្កៃ ដោយរៀបចំមានការចូលរួមពីសំណាក់អ្នកស្និទ្ធស្នាល និង សិល្បករ សិល្បការិនីយ៉ាងរីករាយ។ ក្នុងនោះដែរ អ្នកនិយមតាមដានជីវិតឯកជនរបស់គូស្វាមីភរិយាអ្នកសិល្បៈគូនេះ លើកឡើងថា ខែឧសភា នេះ គឺជាខែរីករាយ ដោយជំទាវ លីឈី និង ឧកញ៉ា ប៊ុន រតនា ទើបតែរៀបចំពិធីខួបអាពាហ៍ពិពាហ៍កាលពីថ្ងៃទី ៥ ខែឧសភា និង ពិធីខួបកំណើត ឧកញ៉ា ប៊ុន រតនា កាលពីថ្ងៃទី ១៩ ខែឧសភា រួច ស្រាប់តែនៅថ្ងៃទី ២១ ខែឧសភា ក៏រៀបចំពិធីឡើងគេហដ្ឋានថ្មីទៀត៕
