នៅថ្ងៃទី ២៦ ខែមិថុនា ឆ្នាំ ២០២៥ នេះ ប៉ូលិសនៅថៃ បានចាប់ខ្លួនអភិបាលស្រុក ១ រូប រួមទាំងកូនចៅក្រោមបន្ទុក ៦ នាក់ ក្នុងករណីសេពគ្រឿងញៀន។
តាមព័ត៌មានបានឱ្យដឹងថា មុននេះ អាជ្ញាធរពាក់ព័ន្ធបានធ្វើការបង្រ្កាបគ្រឿងញៀននៅក្នុងស្រុកទាំង ៦ នៃខេត្ត Nong Bua Lamphu ហើយក៏ចាប់បានអ្នកប្រើប្រាស់គ្រឿងញៀនម្នាក់ តែគេបានធ្លោយមាត់ថា ម្តេចមកចាប់តែខ្លួន ចុះអភិបាលស្រុក និង កូនចៅនោះម្ដេចមិនទៅចាប់ផង ទើបធ្វើឱ្យប៉ូលិសចាប់ផ្តើមស៊ើបអង្កេត និង នាំអភិបាលស្រុកដែលសង្ស័យមកពិនិត្យទឹកនោម។
យ៉ាងណាមិញ អភិបាលស្រុករូបនេះក៏បានសារភាពថាខ្លួនពិតជាបានសេពគ្រឿងញៀនមែន ហើយកូនចៅក្រោមបន្ទុកទាំង ៦ នាក់ក៏បានសារភាពតាមក្រោយថាបានប្រើប្រាស់ដូចគ្នា។ ដោយឡែក ប៉ូលិសបានរកឃើញទៀតថាអភិបាលស្រុករូបនេះមានលាក់កាំភ្លើងខុសច្បាប់នៅក្នុងផ្ទះ។ ចុងក្រោយអភិបាលស្រុកត្រូវគេចោទប្រកាន់ពីបទលាក់អាវុធ ព្រមទាំងត្រូវដកតំណែងជាបណ្តោះអាសន្ន ហើយបញ្ជូនទៅកន្លែងបន្សាបគ្រឿងញៀនសិន ទើបដំណើរការក្តីទាក់ទងនឹងគ្រឿងញៀនតាមក្រោយ៕
ប្រភព៖ Khaosod
