តាមរយៈការបញ្ជាក់ពីក្រុមការងារព័ត៌មាន និង ប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅថ្ងៃទី ២១ ខែឧសភា ឆ្នាំ ២០២៥ បានបញ្ជាក់ថាកម្លាំងជំនាញអធិការដ្ឋាននគរបាលខណ្ឌព្រែកព្នៅ សហការជាមួយកម្លាំងជំនាញផែនការងារនគរបាលព្រហ្មទណ្ឌ បានបំបែកសំណុំរឿងអំពើឃាតកម្មដោយមានទារុណកម្ម អំពើឃោរឃៅ ឬ អំពើរំលោភសេពសន្ថវៈ (យកថ្នាំងងុយដេកដាក់ក្នុងភេសជ្ជៈឱ្យជនរងគ្រោះផឹក ហើយរំលោភសម្លាប់ ប្លន់យកទ្រព្យសម្បត្តិ ជនរងគ្រោះ)។
សមត្ថកិច្ចបានឱ្យដឹងថា ជនរងគ្រោះមានឈ្មោះ វុទ្ធី លីណា ភេទស្រី អាយុ ១៥ ឆ្នាំ ជនជាតិខ្មែរ សញ្ជាតិខ្មែរ មុខរបរនៅផ្ទះ បានស្លាប់នៅចំណុចក្នុងបន្ទប់ទឹកសាលាបឋមសិក្សាវត្តគ្រួស ស្ថិតនៅក្នុងវត្ដជេសដ្ឋាឧត្តម ហៅវត្តគ្រួស ផ្លូវជាតិលេខ៥ ភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ។ ក្នុងនោះជនសង្ស័យ ចំនួន ០៣ នាក់ ដែលសមត្ថកិច្ចបង្ក្រាបបានរួមមាន ៖
១. ឈ្មោះ សុខ ច័ន្ទសុវណ្ណសេង ភេទប្រុស អាយុ ១៨ ឆ្នាំ ជនជាតិខ្មែរ សញ្ជាតិខ្មែរ ទីលំនៅភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ធ្លាប់ស្គាល់ជនរងគ្រោះតាំងពីក្មេងៗ។ ត្រូវបានឃាត់ខ្លួនដោយសង្ស័យជាជនដៃដល់ អ្នករំលោភ និង សម្លាប់។
២. ឈ្មោះ ទៀន ផារ៉ែត ភេទប្រុស អាយុ ១៥ ឆ្នាំ ជនជាតិខ្មែរ សញ្ជាតិខ្មែរ ទីលំនៅភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ត្រូវបានឃាត់ខ្លួន ដោយសង្ស័យរួមគំនិតសម្លាប់។
៣. ឈ្មោះ បូ ឧត្តម ភេទប្រុស អាយុ ១៦ ឆ្នាំ ជនជាតិខ្មែរ សញ្ជាតិខ្មែរ ទីលំនៅផ្ទះគ្មានលេខ ភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ត្រូវបានឃាត់ខ្លួន ដោយសង្ស័យរួមគំនិតសម្លាប់។
សមត្ថកិច្ចបានឱ្យដឹងថា សម្ភារៈបាត់បង់ពីជនរងគ្រោះគឺខ្សែកផ្លាកទីន ចំនួន ០១ ខ្សែ ហើយជនសង្ស័យបានបន្សល់ស្លាកស្នាម និង សម្ភារៈបន្សល់ទុក គឺខ្សែក្រណាត់អាវពណ៌ខ្មៅ ចំនួន ០១ រឹតកជនរងគ្រោះ។ បច្ចុប្បន្នជនសង្ស័យខាងលើ ត្រូវបានកម្លាំងជំនាញអធិការដ្ឋានកំពុងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ដេីម្បីចាត់ការបន្តតាមនីតិវិធីច្បាប់៕
