គិតមកដល់ពេលនេះ នៅសល់រយៈពេលប្រមាណ ១ សប្តាហ៍ទៀតប៉ុណ្ណោះ នឹងឈានចូលពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ ដែលឈានចូលមកដល់នៅថ្ងៃទី ១៤ ខែមេសា ឆ្នាំ ២០២៥។
ក្នុងនោះ ទេវតាឆ្នាំថ្មី ឆ្នាំម្សាញ់ សប្តស័ក នឹងយាងចុះមកជម្ពូទ្វីបនាវេលាទៀបភ្លឺ ឈានចូលថ្ងៃចន្ទ ២ រោច ខែចេត្រ ត្រូវនឹងថ្ងៃទី ១៤ ខែមេសា គ្រឹស្តសករាជ ២០២៥ វេលាម៉ោង ០៤ និង ៤៨ នាទីព្រឹក។ ទ្រង់មានព្រះនាម គោរាគទេវី ជារាជបុត្រីទី ២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយសៀតផ្កាអង្គារបុស្ស អភរណៈ កែវមុក្តា ភក្សាហារទ្រង់តេលំ (ប្រេង) ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រលើខ្នងសេ្តចព្យាគ្ឃៈ (ខ្លា) ជាយានពាហនៈ។
ជាការពិតណាស់ ជារៀងរាល់ឆ្នាំ ឱ្យតែកៀកនឹងពិធីបុណ្យចូលឆ្នាំថ្មីប្រពៃណីជាតិខ្មែរខិតជិតមកដល់ មហាជនអ្នកនិយមតាមដានវិស័យសិល្បៈ ច្បាស់ជាបានឃើញមានសិល្បការិនីមួយចំនួន បានតុបតែងគ្រងឈុតទេវតាឆ្នាំថ្មី។
ជាក់ស្តែង នៅក្នុងឆ្នាំនេះ គេបានឃើញស្រីស្អាត SK ក៏បានបង្ហាញរូបភាព តែងតួជាព្រះនាង គោរាគទេវី យ៉ាងល្អល្អះ ទទួលបានការពេញចិត្ត និង ចែករំលែកយ៉ាងខ្លាំងពីសំណាក់អ្នកគាំទ្រ។ លើសពីនោះ អមនឹងសម្រស់ដ៏ស្រស់សោភាទាំងព្រមហើយនោះ ឈុតដែលប្រណីត ដែលស្រីស្អាត SK បានគ្រងជា ព្រះនាង គោរាគទេវី នេះ គឺមានការតម្លើងដោយ ទឹកគ្រឿង ផងដែរ៕
