ថ្មីៗនេះ មានស្រ្តីជនជាតិប្រេស៊ីលម្នាក់ បានចេញមុខមកទម្លាយបទពិសោធស្នេហារបស់ខ្លួន ដែលខំដើរចូលរួមបុណ្យសពគេជាង ២ ឆ្នាំ ទម្រាំតែញ៉ែកំលោះអ្នករកស៊ីរៀបចំពិធីបុណ្យសពមកធ្វើជាប្តីបាន។
ស្រ្តីរូបនេះឈ្មោះ Daniela Signor ដោយនាងបានរៀបរាប់ឱ្យដឹងថា កាលពីឆ្នាំ ២០២៣ កន្លងទៅ នាងបានទៅចូលរួមបុណ្យសពរបស់នាងញាតិមិត្ត តែក៏បានប្រទះភ្នែកឃើញបុរសម្នាក់ឈ្មោះ Apollo Scariot ជាអ្នករៀបចំពិធីបុណ្យសពនោះ ធ្វើនាងបាក់ចិត្តស្រឡាញ់ ហើយសន្យានឹងខ្លួនឯងថានឹងតាមយកគេឱ្យបាន។ ក្នុងនោះ ជារៀងរាល់ ៣ ខែម្តង នាងតែងតែទៅចូលរួមបុណ្យសពអ្នកនៅក្នុងតំបន់ ដើម្បីឱ្យកំលោះនោះចាប់អារម្មណ៍នាង តែដំបូងឡើយគេមិនអើពើជាមួយនាងឡើយ ដោយសារតែជាមនុស្សផ្តោតនឹងការងារខ្លាំង។
ក្រោយពីការព្យាយាមប្រឹងប្រែងអស់រយៈពេលជាង ២ ឆ្នាំ ចុងក្រោយបុរសដែលនាងប៉ងក៏បានចាប់អារម្មណ៍នាងដូចចិត្ត។ នាង និង គេបានប្រើពេលវេលាមើលចិត្តមើលថ្លើមគ្នា រហូតដល់ក្លាយជាក្តីស្រឡាញ់ ហើយក៏បានសម្រេចចិត្តចូលរោងការកាលពីខែឧសភាកន្លងទៅ។ នេះបង្ហាញឱ្យឃើញថា ស្នេហាអាចកើតមានគ្រប់ទីកន្លែង សូម្បីតែនៅក្នុងពិធីបុណ្យសពក៏អាចកើតឡើងបានដែរ៕
ប្រភព៖ Khaosod
