បើគិតមកដល់ពេលនេះ កូនប្រុសសំណព្វចិត្តរបស់តារាចម្រៀងរ៉េប លោក ជី ដេវីត និង អ្នកនាង ទេព បូព្រឹក្ស គឺអូន ទេព បញ្ចវរាប ហៅ Albert បានចម្រើនវ័យជិត ៣ ឆ្នាំ ហើយ បើគិតចាប់តាំងពីថ្ងៃសម្រាលកាលពីថ្ងៃទី ១៦ ខែកុម្ភៈ ឆ្នាំ ២០២៣ កន្លងទៅ។
ក្នុងនោះដែរ មហាជននិយមតាមដានក្រុមគ្រួសាររបស់តារាចម្រៀងរ៉េបទាំងគូខាងលើនេះ ច្បាស់ជាបានជ្រាបហើយថា បន្ទាប់ពីទទួលបានចំណងដៃកូនប្រុសដ៏ស្រស់ស្អាតហើយនោះ ជីវិតគ្រួសាររបស់ លោក ជី ដេវីត និង អ្នកនាង ទេព បូព្រឹក្ស គឺកាន់តែទទួលបានសុភមង្គលពេញទីថែមទៀតផង។
ងាកមកកាន់ Albert ឯណោះវិញ ក្រោយពីវ័យកាន់តែធំ កាន់តែទទួលបានការស្រឡាញ់ចូលចិត្ត និង គាំទ្រពីសំណាក់មហាជនមិនចាញ់ប៉ាម៉ាក់នោះឡើយ ពោលគឺរាល់សកម្មភាពរបស់ Albert ដែលបានបង្ហោះលើបណ្តាញសង្គមនានា ត្រូវបានទទួលការគាំទ្រ ចែករំលែកជាហូរហែ។ លើសពីនោះទៀត អាយុទើបជិត ៣ ឆ្នាំ ប៉ុណ្ណោះ Albert ក៏មានការងារផ្សព្វផ្សាយផលិតផលកុមារជាបន្តបន្ទាប់ទៀតផង។
ថ្មីៗនេះ នៅលើផេកផ្លូវការរបស់ Albert បានបង្ហោះរូបភាពកាតមួយសន្លឹកយ៉ាងឃ្យូដ និង ភ្ជាប់ជាមួយសារមួយថា៖ «ខ្ញុំបាទ ទេព បញ្ចវរាប ឆ្នាំក្រោយចូលរៀនហើយ មិនទាន់ដឹងម៉ាក់ឱ្យអូនរៀននៅសាលាណាទេបាទ»។ សារ និង រូបភាពនោះ បើទោះជាដឹងថា បានបង្ហោះឡើងដោយអេដមីនផេកក្តី ប៉ុន្តែអ្វី ដែលធ្វើឱ្យអ្នកគាំទ្រមិនអាចទប់អារម្មណ៍ ក្នុងការចូលទៅខមមិនបាននោះ ក៏ព្រោះរូបមួយសន្លឹករបស់ Albert នោះ ពិតជាគួរឱ្យក្នាញ់ណាស់៕
