គ្រប់គ្នាសុទ្ធតែដឹងថា តារាសម្តែង មាន សូនីតា នាងគឺជាស្ថាបនិកហាង ផ្ទះស្រលាញ់ ដែលលក់ផលិតផលក្រមាខ្មែរ និង សម្លៀកបំពាក់ធ្វើពីក្រមា។ បើគិតមកទល់ពេលនេះ អាជីវកម្មហាងរបស់នាង ដំណើរការរយៈពេលប្រមាណ ៩ ឆ្នាំមកហើយ ដោយដំបូងឡើយនាងបានចាប់ផ្តើមបេសកកម្មមួយគឺ «ស្រលាញ់ក្រមាខ្មែរ»។
ហេតុតែស្រលាញ់អាជីវកម្មនេះ មិនថារវល់នឹងអាជីពសិល្បៈប៉ុនណា មាន សូនីតា នាងតែចំណាយពេលជាមួយហាងផ្ទះស្រលាញ់ជានិច្ច។ ហាងនេះមិនត្រឹមតែដាក់លក់ផលិតផលប៉ុណ្ណោះទេ តែថែមទាំងជាសហគមន៍ប្រជុំទៅដោយស្ត្រីខ្មែរជាអ្នកផលិត ដែលបង្កើតឡើងដោយ មាន សូនីតា ផ្ទាល់។
តាមរយៈបទសម្ភាសជាមួយ «ប្រជាប្រិយ» ការបើកអាជីវកម្មហាងផ្ទះស្រលាញ់ តារាសម្តែងមានងារជា រាជិនីក្រមារូបនេះ នាងបានបោះទុនជិត ១០ ម៉ឺនដុល្លារ។ នាងថាតាំងពីបើកមក នាងមិនដែលចំណេញនោះទេ ព្រោះត្រូវចំណាយច្រើន ទំាងការបង្កើតសហគមន៍ ធ្វើឧបករណ៍កីតម្បាញ វត្ថុធាតុដើម និង ការធ្វើគម្រោងផ្សេងៗ។ នាងនិយាយទៀតថា អាជីវកម្មនេះ ជាអាជីវកម្មមួយដែលពិបាកបំផុតសម្រាប់នាង ពោលត្រូវចំណាយដើមទុនផង ពេលវេលាផង កម្លាំងកាយចិត្តផង រីឯការគ្រប់គ្រងមិនស្រួលឡើយ។ នេះបើធៀបទៅអាជីពសម្តែង នាងថតតែមួយភ្លែត អាចរកលុយបានយ៉ាងងាយស្រួល។
រៀបរាប់បន្តទាំងទឹកភ្នែក នាងបានលើកពីអនុស្សាវរីយ៍ដ៏ជូរចត់មួយនៅក្នុងការរកស៊ីជំនួញនេះ គឺនៅអំឡុងបិទខ្ទប់កូវីដ-១៩។ នាងថាគ្រានោះ នាងពិបាកចិត្តខ្លាំងមែនទែន ហាងមិនមានចំណូល ចំណាយគ្រប់សព្វ រហូតត្រូវបង្ខំចិត្តបិទ។ ជាពិសេស លុយដែលកក់ជួលទីតាំងហាងប្រមាណ ៣ ទៅ ៤ ពាន់ដុល្លារ ក៏គេមិនព្រមបង្វិលឱ្យវិញទៀត។ ងាកទៅដៃគូដែលរកស៊ីជាមួយគ្នា គេក៏ចាកចេញទុកឱ្យនាងនៅដោះស្រាយតែម្នាក់ឯង។ និយាយរួម ងាកទៅណាក៏បញ្ហា ចុងក្រោយនាងសម្រេចចិត្តបិទ រួចមកបើកនៅផ្ទះផ្ទាល់ខ្លួនវិញ។
ពេលនោះនាងគិតដែរថា មានតែយើងខ្លួនឯងទេ ដែលត្រូវខំប្រឹងពុះពារខ្លួនឯង ហើយអ្វីដែលធ្វើឱ្យនាងជម្នះបានមកដល់សព្វថ្ងៃ គឺមានតែមួយគត់គឺក្តីស្រលាញ់។ នាងជាមនុស្សមិនដែលបោះបង់ និង មានមហិច្ឆតាមួយគឺ របស់ដែលនាងស្រលាញ់ នាងត្រូវតែធ្វើឱ្យបាន។ ក្រោយជួបព្យុះភ្លៀង នាងនិយាយដែរថា នាងពិតជាមានមោទកភាពចំពោះខ្លួនឯង ដែលជាមនុស្សស្រី តែអាចជម្នះវាបានដល់ថ្ងៃនេះដោយខ្លួនឯង និង តែម្នាក់ឯង៕
