នៅសល់តែប៉ុន្មានថ្ងៃទៀតប៉ុណ្ណោះ ព្រលានយន្តហោះមរតកតេជោ នឹងបើកដំណើរការបណ្តោះអាសន្ន គឺនៅថ្ងៃទី ៩ ខែកញ្ញា ឆ្នាំ ២០២៥។ ព្រលានយន្តហោះនេះ មានរចនាបថជឿនលឿនក្នុងសម័យកាលថ្មី បង្ហាញពីរចនាបថស្ថាបត្យកម្មខ្មែរនាសហសម័យកម្ពុជា និង ក្នុងសម័យសន្តិភាព ក្រោមការដឹកនាំរបស់សម្តេចតេជោ និង សម្តេចធិបតី ហើយក៏បានរួមបញ្ចូលសំណង់មានលក្ខណៈវប្បធម៌ខ្មែរ ចម្លាក់ព្រះពុទ្ធបដិមា និង ចម្លាក់គំនូរជាច្រើនទៀត។
ស្របគ្នាព្រលានយន្តហោះថ្មី នឹងបើកដំណើរការបណ្តោះអាសន្នក្នុងពេលឆាប់ៗ រីឯព្រលានយន្តហោះចាស់ ពោលគឺអាកាសយាន្តអន្តរជាតិភ្នំពេញ កាន់តែកៀកដល់ថ្ងៃបិទជាផ្លូវការដូចគ្នា មហាជនជាច្រើន ក៏បានបង្ហាញអារម្មណ៍នឹករឭកដល់អនុស្សាវរីយ៍នៅឯព្រលានយន្តហោះចាស់ផងដែរ។
ជាក់ស្តែង សូម្បីតែបវកញ្ញា រ៉េត សារីតា ក៏បានបង្ហាញអារម្មណ៍អាឡោះអាល័យនឹងព្រលានចាស់ ដែលធ្លាប់ធ្វើដំណើរកន្លងមក ស្របគ្នានឹងភាពរីករាយក្នុងការមកដល់របស់ព្រលានយន្តហោះថ្មីដូចគ្នាដែរ។
ក្នុងនោះ នៅថ្ងៃទី ០៥ ខែកញ្ញា ឆ្នាំ ២០២៥ នេះ រ៉េត សារីត បានធ្វើដំណើរទៅក្រៅប្រទេស និង ហោះហើរជើងយន្តហោះនៅឯព្រលានយន្តហោះចាស់ថា៖ «សូមលាហើយ លាទៅកាន់កន្លែងមួយដែលពោរពេញដោយការចងចាំដ៏ល្អៗរបស់ខ្ញុំ។ ថ្ងៃនេះជាជើងហោះហើរចុងក្រោយរបស់ខ្ញុំ ចេញពីអាកាសយានដ្ឋានអន្តរជាតិភ្នំពេញ។ រាល់ជំនួបតែងបញ្ចប់ទៅដោយការលា។ ព្រឹកមិញទប់ទឹកភ្នែកមិនជាប់ទេ។ ពេលត្រលប់មកវិញ ខ្ញុំនឹងបានស្គាល់ អាកាសយានដ្ឋានអន្តរជាតិតេជោហើយ។ កម្ពុជាឈានចូលយុគសម័យថ្មី ដែលជាព្រឹត្តិការណ៍ដ៏មានមោទកភាព និងអស្ចារ្យ សម្រាប់ជាតិយើង។ លាហើយ អាកាសយានដ្ឋានអន្តរជាតិពោធិ៍ចិនតុង អរគុណសម្រាប់គ្រប់យ៉ាង»៕
