ទំព័រហ្វេសប៊ុក Thaibytenh គឺជាផេកបង្រៀនភាសាថៃអនឡាញដ៏មានប្រជាប្រិយភាព បង្កើតឡើងដោយ Porheng ដែលជាអ្នកបង្រៀនភាសាថៃ ហើយក៏ជាអ្នកផលិតមាតិកា ទទួលបានការគាំទ្រខ្លាំងពីសំណាក់យុវវ័យ។
ថ្វីបើផេក Thaibytenh ទទួលបានការគាំទ្រច្រើនឆ្នាំមកហើយក្តី ប៉ុន្តែថ្មីៗនេះ Porheng ដែលជាម្ចាស់ផេក និង ជាអ្នកបង្រៀនផ្ទាល់ បានសម្រេចចិត្តរំសាយផេកនេះចោលទាំងស្រុង។ តួយ៉ាង Porheng បានចេញវីដេអូប្រាប់ដល់អ្នកគាំទ្រផងដែរថា ចាប់ពីថ្ងៃនេះតទៅ លោកនឹងបិទផេកនេះចោល ឈប់បង្រៀនភាសាថៃតាមអនឡាញតទៅទៀត។
លោកបានលើកឡើងដែរថា៖ «ខ្ញុំជាអ្នកផលិតមាតិកាជនជាតិខ្មែរ ខ្ញុំងើបពីព្រឹកឡើង បើកភ្នែក បង្រៀនភាសាថៃទៅខ្មែរយើងផ្សេងៗទៀត ខ្ញុំមិនចូលចិត្តអារម្មណ៍មួយហ្នឹងទេ»។
ចំពោះមូលហេតុនៃការរំសាយផេក Thaibytenh លោកបាននិយាយយ៉ាងខ្លីថា ដោយសារតែលោកចេះភាសាថៃស្ទាត់ខ្លាំង ដូច្នេះលោកតាមដានស្តាប់ទាំងព័ត៌មានថៃ ព័ត៌មានខ្មែរ និង ព័ត៌មានអន្តរជាតិ។ ពេលស្តាប់ព័ត៌មានថៃហើយ លោកមានការទើសចិត្តខ្លាំង ធ្វើឱ្យលោកលែងចង់ផលិតមាតិកាលើផេក Thaibytenh បន្តទៀត។
នៅចុងវីដេអូ Porheng ក៏បានបញ្ជាក់ទៅកាន់អ្នកគាំទ្រផងដែរថា បើមានអ្នកសួរថា កាលណាបើកថ្នាក់បង្រៀនភាសាថៃទៀត គឺលែងមានទៀតហើយ លោករំសាយចោលត្រឹមវីដេអូនេះតែម្តង៕
