មហាជនអ្នកគាំទ្រតាមដានកម្មវិធីប្រកួតសម្រស់ Miss World Cambodia បានស្គាល់ហើយពីកញ្ញា សារី សុវត្តី ជាម្ចាស់ជ័យលាភីគ្រងមកុដ Miss World Cambodia មួយរូបក្នុង 2022 ដែលធ្លាប់ជាបវរកញ្ញាដ៏មានប្រជាប្រិយភាពពេញដោយសមត្ថភាព និង ចំណេះដឹង។
យ៉ាងណាមិញ អ្វីដែលធ្វើឱ្យមហាជនស្ដាយខ្លាំងចំពោះម្ចាស់ជ័យលាភីគ្រងមកុដដ៏មានសមត្ថភាពរូបនេះ ដោយកាលពីឆ្នាំ ២០២២ កន្លងនោះ Miss World Cambodia 2022 សារី សុវត្តី ពុំបានមានឱកាសតំណាងឱ្យកម្ពុជាឈរលើឆាកអន្តរជាតិឡើយ ខណៈកម្មវិធីអន្តរជាតិមានការពន្យាពេល និង មានបញ្ហាខ្លះដែលធ្វើឱ្យរូបនាងបាត់បង់ឱកាសក្នុងការចូលរួមប្រកួតកម្មវិធី Miss World នេះ។
ដោយឡែក បន្ទាប់ខកខានឱកាសតំណាងកម្ពុជាចេញទៅប្រកួតលើឆាកអន្តរជាតិក្នុងនាមជា Miss World Cambodia 2022 រំលង ២ ជំនាន់ ថ្មីៗនេះ កញ្ញា សារី សុវត្តី បានធ្វើឱ្យមហាជនអ្នកគាំទ្រផ្ទុះចាប់អារម្មណ៍ភ្ញាក់ផ្អើលជាថ្មី ក្រោយពីបានឃើញវត្តមានរបស់នាងដាក់ពាក្យចូលរួមប្រកួតក្នុងកម្មវិធីដដែលនេះ ដើម្បីដណ្ដើមមកុដប្រចាំឆ្នាំ ២០២៥ ម្ដងទៀត។
យ៉ាងណាមិញ ក្រោយពីកម្មវិធីប្រកួត Miss World Cambodia ដំណើរការប្រកួតតាមរយៈការសម្ភាសផ្ទាល់ជាមួយគណៈកម្មការ មកដល់ថ្ងៃទី ៣១ ខែមិនា ឆ្នាំ ២០២៤ នេះ កម្មវិធីក៏បានប្រកាសរកឃើញម្ចាស់ជ័យលាភីគ្រងមកុដប្រចាំឆ្នាំ ២០២៥ ជាផ្លូវការហើយ គឺបានទៅលើស្រីស្អាតកូនខ្មែរកាត់អង់គ្លេសកញ្ញា រ៉ូសស្យែល ហ្សូលីយ៉ា ខណៈកញ្ញា សារី សុវត្តី ជាប់ជាបេក្ខភាពកំពូល Top 4 នៃកម្មវិធី Miss World Cambodia 2025 ផងដែរ៕
