បើនិយាយពីតារាចម្រៀងរ៉េបជំនាន់ដំបូងៗបង្អស់របស់ប្រទេសកម្ពុជា ច្បាស់ណាស់មហាជននឹងនឹកដល់ DJ Sdey ដែលជារៀមច្បងក្នុងវិស័យ Hip-Hop របស់កម្ពុជា។
ដោយឡែក បច្ចុប្បន្ន បើទោះជា DJ Sdey បានចាកឆ្ងាយពីវិស័យនេះក៏ពិតមែន ប៉ុន្តែលោក ក៏នៅតែបង្ហាញវត្តមានម្តងម្កាលក្នុងកម្មវិធីកម្សាន្ត និង ការប្រគំតន្ត្រីនានា។ លើសពីនោះ អ្វីដែលកាន់តែគួរឱ្យចាប់អារម្មណ៍ DJ Sdey ក៏មានតំណក់ឈាមសិល្បៈបន្តវេនពីលោកម្នាក់ដែរ ពោលគឺកូនប្រុសរបស់លោកក៏ជាតារាចម្រៀងរ៉េបដូចគ្នា គឺ លោក Heng។
យ៉ាងណាមិញ ថ្មីៗនេះ តារាចម្រៀងរ៉េប លោក Heng បានយកនូវវីដេអូរបស់ឪពុកសម្តែងកាលពីប្រមាណ ២៥ ឆ្នាំ មុន ក្នុងកម្មវិធីប្រគំតន្ត្រី «Best Of The Best» មកបង្ហាញអ្នកគាំទ្រ ធ្វើឱ្យអ្នកគាំទ្រចូលទៅបញ្ចេញមតិស្រដៀងៗគ្នាជាច្រើន។
ក្នុងនោះ អ្នកគាំទ្របានសរសើរពីទេពកោសល្យរបស់ DJ Sdey និង ពោលពាក្យថាលោក គឺជារៀមច្បងដ៏ខ្លាំងម្នាក់កាលពីជំនាន់នោះ ហើយមកទល់បច្ចុប្បន្នក៏ដូចគ្នា បើទោះជា Dj Sdey មានវ័យចំណាស់ មានកូន មានចៅក្តី ប៉ុន្តែសមត្ថភាពក្នុងវិស័យចម្រៀងរ៉េបរបស់កំពូលតារាជើងចាស់រូបនេះនៅតែអស្ចារ្យ៕
