នៅថ្ងៃទី ១០ ខែឧសភា ឆ្នាំ ២០២៥ នេះ អ្នកលេងបណ្តាញសង្គមហ្វេសប៊ុក ជាពិសេស អ្នកគាំទ្រតារាស្រីរៀមច្បង ជំទាវ ចន ច័ន្ទលក្ខិណា មានការចាប់អារម្មណ៍យ៉ាងខ្លាំង បន្ទាប់ពីលោកជំទាវ បានរំឭកគម្រោងធ្លាប់យកបុត្រកាលពី ២ ឆ្នាំ មុន ប៉ុន្តែត្រូវបរាជ័យ។
ក្នុងនោះ ជំទាវ ចន ច័ន្ទលក្ខិណា បានចែករំលែករូបភាពកាលពីឆ្នាំ ២០២៣ ក្នុងការសម្តែងជាតួអង្គ ព្រះនាងឥន្ទ្រទេវី ក្នុងរឿង ព្រះបាទជ័យវរ្ម័ន នៅលើទឹកដីអង្គរ និង បានឱ្យដឹងថា កាលនោះ លោកជំទាវបានឆ្លងកូវីដ នៅថ្ងៃសម្តែង ទើបគម្រោងនៃការយកបុត្រត្រូវបរាជ័យ។
ជំទាវ ចន ច័ន្ទលក្ខិណា បានរៀបរាប់ថា៖ «ប្រាប់ត្រង់ គឺ ពេលហ្នឹងខ្ញុំកំពុងធ្វើ IVF យកកូន ខ្ញុំព្យាយាមធ្វើរយៈពេលជិតមួយឆ្នាំ ហើយត្រៀមនឺងបូមយកពង តែចៃដន្យ ថ្ងៃសម្តែង ខ្ញុំឆ្លងកូវីដ ធ្វើឱ្យការព្យាយាមរយៈពេលជាងកន្លះឆ្នាំរបស់ខ្ញុំត្រូវបរាជ័យ តែខ្ញុំសប្បាយចិត្ត និង មានមោទកភាពដ៏ធំធេងណាស់ ដែលមានកិត្តិយសដ៏ធំធេងក្នុងការចូលរួមចំណែកក្នុងការងាររបស់ជាតិយើង»។
យ៉ាងណាមិញ ក្រោយដឹងដំណឹងនេះហើយ អ្នកលេងបណ្តាញសង្គមហ្វេសប៊ុក និង មិត្តភក្តិ បានបង្ហាញការសោកស្តាយ ព្រមទាំងសរសើរដល់ទឹកចិត្តរបស់ ជំទាវ ចន ច័ន្ទលក្ខិណា ក្នុងការប្រឹងប្រែង ដើម្បីសង្គមជាតិក្នុងការរួមចំណែកបង្ហាញអរិយធម៌ វប្បធម៌៕
