បើគិតមកដល់ពេលនេះ រយៈពេលប្រមាណជាង ១ ឆ្នាំ មកហើយ នៃឃាតកម្មដ៏ឃោរឃៅរបស់ឃាតកចិត្តឆៅ ស្រី ស៊ីណា ដែលបានបាញ់សម្លាប់គូស្នេហ៍ម្ចាស់ហាងថតរូប Stellar Pictures លោក ឡុង លីសុង និង កញ្ញា ឃិន កញ្ចនា កាលពីថ្ងៃទី ១៧ ខែមិថុនា ឆ្នាំ ២០២៤ កន្លងទៅ។ ក្នុងនោះ ក្រៅពីជនរងគ្រោះជាគូដណ្តឹង ២ រូប ត្រូវបានស្លាប់ ក៏នៅមានជនរងគ្រោះ ២ រូប ទៀត រងរបួសធ្ងន់ ស្រាលផងដែរ។
ដោយឡែក ក្រោយរង់ចាំការកាត់ក្តី អូសបន្លាយជារឿយៗហើយនោះ នៅថ្ងៃទី ១៩ ខែសីហា ឆ្នាំ ២០២៥ នេះ ជនរងគ្រោះ ១ រូប ក្នុងចំណោម ២ រូប នៅមានជីវិត បានបង្ហោះសារបង្ហាញពីការរកឃើញយុត្តិធម៌សម្រាប់ខ្លួន និង ថៅកែប្រុសស្រីរបស់ខ្លួនហើយ ក្រោយរង់ចាំអស់រយៈពេលជាង ១ ឆ្នាំ។
ក្នុងនោះ ជនរងគ្រោះមួយរូប ដែលមានឈ្មោះថា Hong Rithea Reak បានរៀបរាប់ថា៖ «ទីបំផុតពួកយើងទទួលបានយុត្តិធម៌ហើយ! ពេលព្រឹកថ្ងៃទី ១៩ សីហា ២០២៥ តុលាការ តុលាការកំពូលបានប្រកាសសេចក្តីសម្រេច យកការសម្រេចរបស់សាលាឧទ្ធរណ៍ទុកជាបានការដដែល ។ យុត្តិធម៌នៅតែមានសម្រាប់ប្រជាពលរដ្ឋស្លូតត្រង់ដូចយើងខ្ញុំ។
ខ្ញុំបាទសូមអរគុណ ទៅដល់សម្ដេចពុក ហ៊ុន សែន និង សម្ដេចបវរអធិបតី ហ៊ុន ម៉ាណែត ដែលលោកតែងតែយកចិត្តទុកដាក់នៅក្នុងរឿងក្តីរបស់យើងខ្ញុំ តាំងពីការកើតរឿងដំបូង រហូតទទួលបានយុត្តិធម៌នៅពេលនេះ។ ខ្ញុំបាទជាប្រជាជនស្លូតត្រង់ម្នាក់ ក៏សូមជូនពរឱ្យសម្ដេចទាំងទ្វេមានសុខភាពល្អ និង បន្តដឹកនាំដល់កូនចៅ និង ប្រទេសកម្ពុជាតរៀងទៅ។
ហើយឆ្លៀតឱកាសពេលនេះ ក៏សូមអរគុណទៅដល់ ឯកឧត្តម កើត រិទ្ធ ប្រធានក្រសួងយុត្តិធម៌, ឯកឧត្តម គី តិច ប្រធានក្រុមមេធាវីស្ម័ក្សចិត្តតេជោសែន និង មន្ត្រីតុលាការគ្រប់ គ្រប់ស្ថានប័ន ។ សូមឱ្យលោកទាំងពីរជោគជ័យគ្រប់ភារកិច្ច ។ ហើយក៏សូមអរគុណដល់ប្រជាពលរដ្ឋទាំងអស់ ដែលបានជួយឈឺឆ្អាលយកអាសារជាមួយនឹងរឿងក្តីរបស់ខ្ញុំ តាំងពីថ្ងៃកើតដំបូងរហូតមកដល់ពេលនេះ។ សូមប្រជាជនខ្មែរទាំងអស់សុំមានសុខភាពល្អ និង ផ្លូវចិត្តរឹងមាំ»៕
