ថ្មីៗនេះ មានករណីការស្លាប់យ៉ាងចម្លែករបស់ទាហានជើងគោកថៃចំនួន ២ នាក់ ដោយម្នាក់បានស្លាប់អណ្តែតនៅទន្លេចៅផ្រះយា រីឯម្នាក់ទៀតដេកស្លាប់នៅក្នុងឡានផ្ទាល់ខ្លួន។
តាមព័ត៌មានបានឱ្យដឹងថា កាលពីថ្ងៃទី ៥ ខែសីហា ឆ្នាំ ២០២៥ កន្លងទៅ គេបានប្រទះឃើញសពរបស់យោធាវ័យ ៤១ ឆ្នាំម្នាក់ មានឋានៈជាវរសេនីយ៍ទោ បានអណ្តែតមកក្បែរមាត់ច្រកទឹកវត្តអរុណ នាទន្លេចៅផ្រះយា។ ក្នុងនោះ តាមការត្រួតពិនិត្យ គេឃើញថាសាកសពនេះមិនមានស្លាកស្នាមនៃឃាតកម្មឡើយ ហើយក៏បានបញ្ជូនឱ្យញាតិមិត្តយកទៅធ្វើបុណ្យតាមប្រពៃណី។
លុះមកដល់ថ្ងៃទី ៦ ខែសីហា ឆ្នាំ ២០២៥ នេះ មានព័ត៌មានបានឱ្យដឹងទៀតថា គេបានប្រទះឃើញបុរសវ័យ ៣៧ ឆ្នាំម្នាក់ មានតួនាទីជាមន្រ្តីយោធា ឋានៈវរសេនីយ៍ទោ បានស្លាប់នៅក្នុងឡានដែលកំពុងចតនៅក្នុងហាងទំនើបមួយកន្លែងនាទីក្រុងបាងកក។ តាមការត្រួតពិនិត្យ គេឃើញថាក្នុងឡានបុរសនេះ មានហុយផ្សែងទ្រលោម ហើយដងខ្លួនមានការរលាកយ៉ាងធ្ងន់ធ្ងរ។ ការស្លាប់របស់បុរសនេះ ត្រូវបានសង្ស័យជាការធ្វើអត្តឃាត ប៉ុន្តែយ៉ាងណាក៏ដោយគេត្រូវការធ្វើកោសល្យវិច្ច័យលើសាកសពបញ្ជាក់មើលសិន៕
