ថ្មីៗនេះនៅលើបណ្តាញសង្គមហ្វេសប៊ុក និង TikTok បានកំពុងផ្ទុះការចាប់អារម្មណ៍ខ្លាំងជាមួយរូបភាព និង វីដេអូ ដ៏រំភើបចិត្ត ដែល CEO វ័យក្មេងរូបសង្ហា លោក អ៊ឹង ស៊ីវឈន់ បានធ្វើ Proposal សុំគូស្នេហ៍រៀបការយ៉ាងរ៉ូមែនទិក។ កម្មវិធីនេះ ឃើញធ្វើឡើងជាលក្ខណៈឯកជន ជាពិសេស មានការចូលរួមច្រៀងអបអរបង្កភាពភ្ញាក់ផ្អើល ពីព្រះនាងតូចនរោត្តម ចេនណា ផងដែរ។
គួរឱ្យកត់សម្គាល់ទៀតនោះ គូស្នេហ៍ដែល លោក អ៊ឹង ស៊ីវឈន់ សុំរៀបការ ជាបុត្រីក្នុងសែរាជវង្ស គឺ ព្រះអង្គម្ចាស់ក្សត្រិយ៍ នរោត្តម ពង្សសូរិយា។ ទ្រង់ជាព្រះបុត្រីរបស់សម្តេចព្រះមហិស្សរា នរោត្តម ចក្រពង្ស ឧត្តមប្រឹក្សាផ្ទាល់របស់ព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី និង ជាសមាជិកក្រុមប្រឹក្សាធម្មនុញ្ញ និង ព្រះមាតាព្រះនាម មែន កែវមុនីរ៉ែន ។
បើតាមគណនីហ្វេសប៊ុក និង Instagram របស់ លោក អ៊ឹង ស៊ីវឈន់ ជារឿយៗលោកតែងបង្ហោះរូបភាពផ្អែមល្ហែម តាមរយៈដំណើរកម្សាន្តជាមួយគ្នា និង មានកាដូជូននៅក្នុងឱកាសពិសេសៗផងដែរ។ ហេតុដូច្នេះ អាចសបញ្ជាក់ថា លោក និង ព្រះអង្គម្ចាស់ក្សត្រិយ៍ នរោត្តម ពង្សសូរិយា បានសិក្សាមើលចិត្តថ្លើមគ្នាអស់រយៈពេលជាច្រើនឆ្នាំមកហើយ។
គួរឱ្យដឹងដែរថា លោក អ៊ឹង ស៊ីវឈន់ ជាអគ្គនាយកប្រតិបត្តិនៃទឹកស្ព្រីងប្រូវីដា។ លោកត្រូវបានគេស្គាល់ជាកូនប្រុសរបស់ ឧកញ៉ា អ៊ឹង ប៊ុនហ៊ូវ និង លោកជំទាវ ហេង សុខា។ ថ្វីដ្បិតក្មេងវ័យ តែអគ្គនាយកប្រតិបត្តិសមត្ថភាពខ្ពស់រូបនេះ អាចដឹកនាំក្រុមហ៊ុនរីកចម្រើនក្នុងរយៈពេលដ៏ខ្លី។ ជារឿយៗ លោកតែងសកម្មនៅក្នុងសកម្មភាពជួយសង្គមផងដែរ។ កាលពីឆ្នាំមុន លោកក៏បានបើកសម្ពោធភោជនីយដ្ឋាន Omakase ប្រណីតមួយកន្លែង ឈ្មោះថា Hangetsu Phnom Penh ស្ថិតនៅក្នុងតំបន់បឹងកក់ រាជធានីភ្នំពេញ៕
