កាលពីថ្ងៃទី ៣ ខែកុម្ភៈ ឆ្នាំ ២០២៤ កន្លងទៅនេះ មហាជនអ្នកគាំទ្រពិតជាភ្ញាក់ផ្អើល និង សោកស្តាយខ្លាំងណាស់ ព្រោះមានដំណឹងថាតារាស្រី Barbie Hsu ឬតួអង្គសាន់ឆាយក្នុងរឿង F4 បានលាកចាកលោកទៅហើយ នៅឯប្រទេសជប៉ុន ក្នុងវ័យត្រឹម ៤៨ ឆ្នាំ ដោយសារតែជំងឺផ្តាសាយ និង រលាកសួត។
យ៉ាងណាមិញ មានមហាជនអ្នកគាំទ្រ ក៏ដូចជាអ្នកស្គាល់នាងច្រើនណាស់ ដែលមកចូលរួមរំលែកទុក្ខទៅកាន់គ្រួសាររបស់នាង ជាពិសេសនោះ គេឃើញថា Wang Xiaofei ដែលជាអតីតស្វាមីរបស់នាងក៏បានចូលរួមរំលែកទុក្ខ ដោយសារតែប្តូររូបភាព Cover នៅតាមបណ្តាញសង្គមរបស់ខ្លួនឱ្យទៅជាពណ៌ខ្មៅផងដែរ។ លើសពីនេះទៅទៀត Wang Xiaofei ក៏បានធ្វើដំណើរមកដល់តៃវ៉ាន់ហើយ ហើយមើលទៅលោកមានទឹកមុខក្រៀមក្រំខ្លាំងណាស់ ដោយប្រាកដជាមកចូលរួមពិធីបុណ្យសពរបស់អតីតភរិយា។
ដោយឡែក គួរឱ្យដឹងដែរថា Wang Xiaofei និង Barbie Hsu ធ្លាប់បានរួមរស់ជាមួយគ្នាអស់រយៈពេលជាង ១០ ឆ្នាំ ដោយទទួលបានកូនៗ ២ នាក់ជាចំណងដៃ។ ក្រោយនៅឆ្នាំ ២០២១ អ្នកទាំងពីរក៏បានប្រកាសលែងលះគ្នា ដោយការលែងលះនេះហាក់មានភាពរកាំរកូសច្រើនណាស់។ តែយ៉ាងណាក៏ដោយ មហាជនអ្នកគាំទ្រពិតជារំជួលចិត្ត ចំពោះទឹកចិត្តរបស់ Wang Xiaofei ជាអតីតស្វាមី ដែលនៅខ្វល់ខ្វាយសោកស្តាយចំពោះអតីតភរិយា៕
ប្រភព៖ Teenee
