កាលពីថ្ងៃទី ១៨ ខែកុម្ភៈ ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក មានក្តីរំជួលចិត្តយ៉ាងខ្លាំង ក្រោយពីបានឃើញការចែកចាយព័ត៌មានរបស់មន្ត្រីអាវុធហត្ថចំនួន ៤ រូប ដែលជួបគ្រោះថ្នាក់ចរាចរណ៍បាត់បង់ជីវិតអំឡុងពេលចុះបេសកកម្មជាមួយក្រុមការងារអាវុធហត្ថចល័ត នៅស្រុកលំផាត់ ខេត្តរតនៈគិរី។ នេះបើតាមការឱ្យដឹងពីក្រុមគ្រួសារ។
អ្វីដែលខ្លោចចិត្តយ៉ាងខ្លាំងនោះក្នុងចំណោមជនរងគ្រោះទាំង ៤ នាក់ មានជនរងគ្រោះមួយរូបមានឈ្មោះថា ប្រាក់ ស័ក្ខី ដែលទើបតែភ្ជាប់ពាក្យថ្មីៗ បានប្រមាណកន្លះខែ ពោលគឺទើបតែបានរៀបចំពិធីតាមប្រពៃណីនឹងគូដណ្តឹងកាលពីថ្ងៃទី ០២ ខែកុម្ភៈ ឆ្នាំ ២០២៥ កន្លងទៅ តែបែរជាមកជួបរឿងអកុសលបែបនេះ។ ក្នុងនោះដែរ មហាជនបានចូលរួមរំលែកទុក្ខដល់ក្រុមគ្រួសារនៃសព ដែលបានបាត់បង់សមាជិកគ្រួសារ និង ធនធានដ៏សំខាន់ក្នុងសង្គម។
ដោយឡែក អ្វីដែលធ្វើឱ្យមហាជនកាន់តែទប់ទឹកភ្នែកមិនបាន ក្រោយបានឃើញខាងស្រីមានគណនីហ្វេសប៊ុកឈ្មោះ Ma Nita បង្ហោះសារយ៉ាងក្ដុកក្ដួលថា ៖ «ប្ដីដឹងអត់ រង្វង់ដៃប្ដីកក់ក្ដៅប៉ុនណា? សំឡេងប្ដីពីរោះ និយាយតិចៗថាស្រលាញ់ប្រពន្ធ។ ប្ដី ថើបក្បាលអូនថ្នមៗ ហើយថាប្រពន្ធណាគេក្រអូបម៉េស? ជាតិនេះបងជាប្ដីល្អ អូនផ្សងណា៎ អូនសុំធ្វើប្រពន្ធបងគ្រប់ៗជាតិ»៕
