ថ្មីៗនេះ សារព័ត៌មានរបស់ចិនមួយបានរាយការណ៍ពីរឿងរ៉ាវដ៏គួរឱ្យរំជួលចិត្តរបស់ស្រ្តីម្នាក់ ដែលមានសំណាងបានវិលជួបម្តាយបង្កើតវិញ ក្រោយពីបែកគ្នាអស់ជាង ៣០ ឆ្នាំ ដោយសារតែការលេង TikTok ។
តាមព័ត៌មានបានឱ្យដឹងថា ស្រ្តីខាងលើនេះមានវ័យ ៣២ ឆ្នាំ រស់នៅទីក្រុង Wuzhou ខេត្ត Zhejiang។ តាំងពីតូចមកត្រូវបានគ្រួសារមួយយកមកចិញ្ចឹមឱ្យធំធាត់ តែនៅក្នុងចិត្តនាងតែងតែចង់វិលត្រឡប់ទៅរកម្តាយបង្កើតវិញ ប៉ុន្តែដោយសារកាលណោះនាងនៅតូចពេក ទើបគ្មានការចងចាំអ្វីទាក់ទងនឹងស្រុកកំណើត ឬ ម្តាយរបស់នាងឡើយ។ ចៃដន្យនៅថ្ងៃមួយ នាងបានអូស TikTok លេងជាធម្មតា ស្រាប់តែឃើញវីដេអូស្រ្តីម្នាក់ដែលបានប្រកាសរកកូន ហើយស្រ្តីនោះមានមុខមាត់ស្រដៀងនាងជាខ្លាំង ទើបនាងសម្រេចចិត្តថាទៅពឹងប៉ូលិសឱ្យជួយទាក់ទងស្រាវជ្រាវរឿងនេះឱ្យ។
ប៉ូលិសបានយក DNA របស់នាងទៅពិនិត្យ ទើបទាក់ទងទៅខាងស្រ្តីដែលប្រកាសរកកូននោះ ចុងក្រោយលទ្ធផលក៏ចេញមកថាទាំងពីរនាក់នេះ គឺពិតជាម្តាយកូនបង្កើតនឹងគ្នាពិតមែន។ ដោយឡែក ស្រ្តីជាម្តាយបានឱ្យដឹងថា កាលពីជាង ៣០ ឆ្នាំមុន ខ្លួនបានបង្កើតបានកូនស្រីទីបីម្នាក់ តែដោយសារតែក្រខ្សត់ពេក ក៏បានយកទៅផ្ញើឱ្យគេចិញ្ចឹម រួចខ្លួនចេញទៅរកស៊ីនៅឯខេត្តឆ្ងាយ មកវិញក៏ស្រាប់តែបាត់កូនស្រីឈឹងតែម្តង។ ខ្លួនបានព្យាយាមតាមរកកូនតាំងពីពេលនោះមក ដោយប្រើគ្រប់វិធី ហើយឆ្នាំ ២០២២ កន្លងទៅ ក៏បានសម្រេចចិត្តចាប់ផ្តើមផុសវីដេអូនៅតាម TikTok ហើយក៏មិននឹកស្មានថាពិតជារកកូនស្រីឃើញមែន៕
ប្រភព៖ Khaosod
