ជារឿងដ៏គួរឱ្យសោកសង្រេង និង រំជួលចិត្តបំផុត នៅល្ងាចថ្ងៃទី ១០ ខែមករា ឆ្នាំ ២០២៥ កន្លងទៅ មានករណីគ្រោះថ្នាក់ចរាចរណ៍មួយបានកើតឡើង នៅតាមបណ្ដោយផ្លូវ ៦០ ម៉ែត្រ ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ បង្កឡើងដោយបុរសម្នាក់ស្រវឹងជោកជាំ បើករថយន្ដបុកម៉ូតូបើកបរក្នុងទិសដៅផ្សេងគ្នា បណ្ដាលឱ្យអ្នកជិះម៉ូតូ ៣ នាក់ស្លាប់ រួមមានឪពុក និង កូនតូច ២ នាក់ ព្រមទាំងម្ដាយរងរបួសធ្ងន់ដាច់ជើង ដែលបច្ចុប្បន្ន ត្រូវបានបញ្ជូនទៅសង្គ្រោះបន្ទាន់នៅឯប្រទេសវៀតណាម។
ទន្ទឹមទៅនឹងស្ថានភាពកំពុងសង្គ្រោះបន្ទាន់នេះដែរ នៅថ្ងៃទី ១៦ ខែមករា ឆ្នាំ ២០២៥ នេះ តាមរយៈគណនីដែលមានឈ្មោះ Yu Na ត្រូវជាបងស្រីជីដូនមួយរបស់ជនរងគ្រោះ បានបញ្ជាក់ពីស្ថានភាពរបស់ជនរងគ្រោះ នៅប្រទេសវៀតណាមឱ្យបានដឹងថា ប្អូនស្រីនាងបានដឹងខ្លួនក្នុងបន្ទប់សង្រ្គោះបន្ទាន់នៅក្នុងពេទ្យវៀតណាមហើយ ដែលពេទ្យគេមានម៉ោងសម្រាប់អនុញ្ញាតឱ្យសាច់ញាតិចូលសួរសុខទុក្ខ ខណៈគ្រាន់តែស្រ្តីរងគ្រោះបានឃើញម្ដាយភ្លាម ក៏បានសួរសំណួរ និង សន្ទនាដូចតទៅ ៖
កូន: ម៉ាក់ខ្ញុំកើតអី? គ្រោះថ្នាក់នៅណា?
ម៉ាក់: កូនគ្រោះថ្នាក់ចរាចរណ៍ នៅផ្លូវ ៦០ ម៉ែត្រឡានបុក
កូន : ខ្ញុំនៅណា?
ម៉ាក់ : កូននៅពេទ្យវៀតណាម
កូន : ម៉េចខ្ញុំនៅនេះ? ម៉េចអត់មានអ្នកមកមើលខ្ញុំអីម្នាក់ចឹង? ខ្ញុំនិយាយជាមួយពេទ្យសុំពេទ្យចេញ តែគេមិននិយាយមួយខ្ញុំទេ
ម៉ាក់ : គ្រួសារយើងនាំមកនេះឆាប់ជា ដោយសារកូននៅបន្ទប់រាងធ្ងន់ ចឹងពេទ្យគេអត់ឱ្យអ្នកសួរសុខទុកមកច្រើនទេ ហើយកូននិយាយខ្មែរគេស្តាប់ម៉េចបាន
កូន : ម៉ាក់ប្រាប់ខ្ញុំឱ្យត្រង់មើលថា អូនតាន់ និង អូនយូរ៉ា ស្លាប់មែន? ហើយបងទីន ម៉េចហើយ ម៉េចអត់មកមើលខ្ញុំចឹង ? ហើយគាត់និយាយតទៀតថា ព្រោះខ្ញុំយល់សពឃើញកូនស្លាប់។
យ៉ាងណាមិញ តាមប្រភពបានឱ្យដឹងទៀតថាស្ត្រីជាម្ដាយ បានកុហកជនរងគ្រោះរហូត មិនហ៊ានប្រាប់តាមត្រង់ពីដំណឹងមរណភាពរបស់ប្ដី និង កូនៗទេ ទាំងដែលថ្ងៃទី ១៥-១៦ នេះ គឺជាថ្ងៃបុណ្យ ៧ ថ្ងៃសពប្តី និង កូនៗរបស់នាង៕
