មហាជនអ្នកប្រើប្រាស់បណ្ដាញសង្គម បាន និង កំពុងនាំគ្នាសម្ដែងក្ដីរំជួលចិត្ត ក្រោយបានឃើញរូបភាពចំនួន ២ សន្លឹក បង្ហោះនៅលើបណ្ដាញសង្គមបង្ហាញអំពីទិដ្ឋភាពសិស្សអនុវិទ្យាល័យម្នាក់កំពុង ហូបបាយក្នុងលេណដ្ឋាន ក្នុងឯកសណ្ឋានជាសិស្ស គួរឱ្យអាណិតបំផុត។
រូបភាពដែលផ្ទុះការរំជួលចិត្តនេះផងដែរ ត្រូវបានបង្ហោះឡើងដោយសារព័ត៌មានក្នុងស្រុក ដោយបានបញ្ជាក់ថា ក្មេងប្រុសគឺជាសិស្សអនុវិទ្យាល័យឈូក ស្ថិតនៅភូមិថ្នល់បត់ ឃុំគោកមន ស្រុកបន្ទាយអំពិល ខេត្តឧត្តរមានជ័យ ជិតប្រាសាទតាមាន់ ដែលបានកំពុងហូបបាយក្នុងលេណដ្ឋាន ក្រោយពេលដែលទាហានថៃ បានបើកការវាយប្រហារមកលើកម្ពុជា នៅព្រឹកថ្ងៃទី ០៨ ខែធ្នូ ឆ្នាំ ២០២៥។
គួរឱ្យដឹងផងដែរថា នៅព្រឹកថ្ងៃទី ០៨ ខែធ្នូ ឆ្នាំ ២០២៥ នេះ ក្រសួងការពារជាតិ បានចេញសេចក្តីប្រកាសព័ត៌មានស្ដីពីស្ថានភាពនៅតាមបន្ទាត់ព្រំដែនកម្ពុជា-ថៃ ឱ្យបានដឹងថា ចាប់ពីវេលាម៉ោងប្រមាណ ០៥:០៤ នាទី នៅព្រឹកថ្ងៃទី ៨ ខែធ្នូ ឆ្នាំ ២០២៥ នេះ យោធាថៃបានបើកការបាញ់ប្រហារមកលើកងកម្លាំងកម្ពុជា នៅក្នុងតំបន់អានសេះ ខេត្តព្រះវិហារ បន្ទាប់មកបាញ់នៅប្រាសាទតាមាន់ធំ ដោយប្រើប្រាស់រថក្រោះបាញ់ចូលជាច្រើន និង នៅតំបន់ប្រាសាទព្រះវិហារ នៅ៥មករា និង នៅចំការចេក ហើយការបើកការវាយប្រហារនេះ ធ្វើឡើងបន្ទាប់ពីយោធាថៃបានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ជាពិសេសឧបទវហេតុកាលពីម្សិលមិញនៅព្រលានថ្ម ក្នុងចេតនាញុះញង់ដើម្បីនាំដល់ការប៉ះទង្គិចគ្នា៕
