បើគិតមដល់ពេលនេះ រយៈពេលជិតកន្លះឆ្នាំមកហើយ ដែលលោក ប៉ាន់ ខែមម៉ានូ តួឯកប្រុសក្នុងរឿង «កូនប្រុសក្រោមពន្លឺព្រះចន្ទពេញបូណ៍មី» បានដឹកដៃភរិយារូបស្រស់ចូលរោងការតាមប្រពៃណី កាលពីថ្ងៃទី ១៩ ខែវិច្ឆិកា ឆ្នាំ ២០២៤ កន្លងទៅ។
កាលនោះ ពិធីមង្គលការរបស់តារាប្រុស ប៉ាន់ ខែមម៉ានូ និង ភរិយា បានរៀបចំឡើងយ៉ាងអធិកអធមនៅទីរួមខេត្តតាកែវ ដោយកម្មវិធីមង្គលការបានរៀបចំឡើងទៅតាមប្រពៃណីទំនៀមទម្លាប់ខ្មែរយ៉ាងខ្ជាប់ខ្ជួន សូម្បីតែសម្លៀកបំពាក់គ្រងលើកូនប្រុសស្រី ក៏សមសួន ប្រណីត ថ្លៃថ្នូរទៅតាមប្រពៃណីខ្មែរដែរ។ មិនត្រឹមតែប៉ុណ្ណោះ បើទោះជារៀបការនៅឯខេត្តក៏ពិតមែន ប៉ុន្តែមានមិត្តទាំងក្នុង ក្រៅសិល្បៈ និង តារាល្បីៗជាច្រើនបានទៅចូលរួមពិធីមង្គលការរបស់លោក។
យ៉ាងណាមិញ ក្រោយរៀបការអស់រយៈពេលជិតកន្លះឆ្នាំ កាលពីពេលថ្មីៗនេះ លោក ប៉ាន់ ខែមម៉ានូ បានប្រកាសដំណឹងល្អជាថ្មីដល់អ្នកគាំទ្រ ដោយភរិយារបស់លោកកំពុងពពោះកូនដំបូងផងដែរ។ ក្នុងនោះដែរ លោក ប៉ាន់ ខែមម៉ានូ ក៏បានបង្ហោះសារអមមួយឃ្លាថា៖ «អារម្មណ៍ដំបូងដែលពុំធ្លាប់មាន! ជិតបានឃើញមុខហើយកូនប៉ាៗ »៕
