និយាយដល់ជីវិតឯកជនរបស់តារាសម្ដែងស្រីនិយមស្ទីលសិចស៊ី អ៊ុន អាលីយ៉ា គិតមកដល់ពេលនេះ រយៈពេលជាង ៦ ឆ្នាំហើយ ដែលអ្នកនាងបានរៀបការសាងគ្រួសារជាមួយស្វាមីឈ្មោះ សួ លីឃាំង កាលពីអំឡុងឆ្នាំ ២០១៩ និង បានលាស្រុកកំណើតទៅរស់សាងជីវិតគ្រួសារលើទឹកដីសហរដ្ឋអាមេរិក។
យ៉ាងណាមិញ ប៉ុន្មានឆ្នាំមកនេះ ដ្បិតតែយូរៗមកលេងស្រុកកំណើតម្ដង តែអ្នកនាង អ៊ុន អាលីយ៉ា តែងបង្ហាញពីសកម្មភាពជីវិតគ្រួសាររបស់នាងនៅឯសហរដ្ឋអាមរិក ដោយទទួលបានគ្រួសារតូចដ៏កក់ក្ដៅ និង មានក្ដីសុខខ្លាំងជាមួយស្វាមី និង កូនស្រីដ៏គួរឱ្យស្រឡាញ់ម្នាក់មានវ័យ ៥ ឆ្នាំហើយ។
មកដល់ពេលនេះដែរ តាមរយៈបណ្ដាញសង្គមរបស់តារាសម្ដែង អ៊ុន អាលីយ៉ា បង្ហាញសកម្មភាពថ្មីៗនៃជីវិតឯកជនរបស់អ្នកនាង បានឱ្យដឹងថាជីវិតគ្រួសាររបស់អ្នកនាងកាន់តែមានសុភមង្គលពេញលេញ ខណៈអ្នកនាង និង ស្វាមី ក៏កំពុងត្រៀមស្វាមគមន៍សមាជិកថ្មីម្នាក់ទៀត គឺជាទាយាទទី ២ ដែលជិតគ្រប់ខែសម្រាលហើយផងដែរ៕
