បើគិតមកដល់ពេលនេះ រយៈពេលជាង ៦ ឆ្នាំ មកហើយ ដែលតារាចម្រៀងលោក សុខ រក្សា និង តារាស្រី អ្នកនាង កុល ដាវី បានចាប់ដៃគ្នារៀបការសាងគ្រួសារកាលពីថ្ងៃទី ០៨ ខែមិនា ឆ្នាំ ២០១៩ មក។ ក្នុងនោះដែរ មកដល់ពេលនេះ តារាប្រុសស្រីមួយគូនេះ ក៏ទទួលបានចំណងដៃកូនស្រីម្នាក់មានអាយុ ៣ ឆ្នាំ។
ជាការពិតណាស់ មហាជននិយមតាមដានជីវិតឯកជនរបស់ លោក សុខ រក្សា និង អ្នកនាង កុល ដាវី បានសរសើរដល់គូស្វាមីអ្នកសិល្បៈមួយគូនេះជារឿយៗ ដោយគេសង្កេតឃើញថា គូជីវិតរបស់អ្នកទាំង ២ គឺពុំសូវមានរឿងរកាំរកូសនោះឡើយ ពោលគឺលោក សុខ រក្សា និង អ្នកនាង កុល ដាវី មិនដែលបង្ហាញពីបញ្ហាអ្វីម្តងណាឡើយក្នុងគ្រួសារលើបណ្តាញសង្គម។
ផ្ទុយទៅវិញ គេតែងតែឃើញគូស្វាមីភរិយាខាងលើនេះ បង្ហាញតែភាពផ្អែមល្ហែម សុភមង្គលក្នុងគ្រួសារចំពោះការមើលថែគ្នាក្នុងនាមជាស្វាមីភរិយា និង ជាប៉ាម៉ាក់ដ៏ល្អសម្រាប់កូន។ លើសពីនោះ គូស្វាមីភរិយាទាំង ២ ម្នាក់ៗប្រឹងប្រែងធ្វើការរកស៊ី ដូចពាក្យចាស់ពោលថា សំណាបយោងដី ស្រីយោងបុរស អ៊ីចឹង៕
