ក្នុងវ័យ ២៥ ឆ្នាំ សព្វថ្ងៃ លោក ម៉ៅ ដាលីន មានអាជីពជាអ្នកថត ឬហៅថា Cameraman។ លោកអាចថតរូបភាព និង វីដេអូគ្រប់ប្រភេទ ជាពិសេស កំពុងមមាញឹកខ្លាំងនឹងការថតកម្មវិធីផ្សេងៗ។ បើនិយាយពីទំនោរឬស្ទីលថតរបស់លោក លោកចូលចិត្តថតបែប Documentary ឬឯកសារ ដែលបង្ហាញពីព្រឹត្តិការណ៍ និង ការរស់នៅជាក់ស្តែង។ ខណៈមានទេពកោសល្យ និង សមត្ថភាព មិនចាញ់រៀមច្បងជើងខ្លាំង ពិតមែនទៅចំណេះជំនាញលើការថតរូបនេះ លោករៀនសូត្របានតិចតួចបំផុត។
មានស្រុកកំណើតនៅខេត្តកំពង់ចាម យុវជន ម៉ៅ ដាលីន សិក្សាបានត្រឹមថ្នាក់ទី ៩។ លោកចាប់ផ្តើមរៀនថតរូបនៅក្នុងឆ្នាំ ២០២១ ដោយរៀនតាមរយៈ YouTube មើល និង ស្រាវជ្រាវដោយខ្លួនឯង។ ក្រោយមកនៅឆ្នាំ ២០២២ លោកទទួលបានការងារខាងប្រព័ន្ធផ្សព្វផ្សាយ(Media) នៅក្នុងក្រុមហ៊ុនមួយ ដែលនេះជាឱកាស ដែលលោកបានរៀនសូត្របច្ចេកទេសថតពេញទី ពីអ្នកជំនាញនៅក្នុងក្រុមហ៊ុននោះ។
ប្រឡូកអាជីពថតរូបរយៈពេលខ្លី អ្នកថតរូបពោរពេញដោយគំនិតសិល្បៈ ម៉ៅ ដាលីន តែងឆ្លៀតឱកាសបង្ហាញសមត្ថភាពតាមរយៈកម្មវិធីប្រកួតថតរូបផ្សេងៗ។ ជាលទ្ធផលជាក់ស្តែង នៅក្នុងឆ្នាំ ២០២២ លោកឈ្នះជ័យលាភីលេខ ១ នៅក្នុងកម្មវិធីប្រកួតថតរូប ផ្តោតលើប្រធានបទ «Light and Contrast» ដែលបង្កើតឡើងដោយសាលាថតរូប Imagery Skills Academy។ មកដល់ឆ្នាំ ២០២៤ លោកឈ្នះជ័យលាភីលេខ ១ ក្នុងការប្រកួតថតរូប ដែលរៀបចំឡើងដោយរដ្ឋបាលស្រុកសំបូរ ខេត្តក្រចេះ ធ្វើឡើងក្នុងគោលបំណងជួយលើកកម្ពស់វិស័យទេសចរណ៍នៅក្នុងស្រុកសំបូរ ខេត្តក្រចេះតែម្តង។ ហើយថ្មីៗនេះ នៅដើមឆ្នាំ ២០២៥ លោកប្រកួតឈ្នះជ័យលាភីលេខ ១ ការប្រកួតថតរូប Eyes on Cambodia ដែលមានអ្នកដាក់ពាក្យចូលរួមដល់ទៅជាង ៣០០ នាក់ សុទ្ធសឹងជើងខ្លាំង មានទាំងជនជាតិខ្មែរ និង បរទេស។
សម្រាប់គោលដៅជាមួយអាជីពថតទៅថ្ងៃមុខ លោកចង់ក្លាយជា Fine Art Photographer ឬ អ្នកថតរូបបែបវិចិត្រសិល្បៈ។ លោកចង់មានភាពល្បីល្បាញដូចទៅនឹង លោក ម៉ក់ រ៉េមីស្សា ដែលជាអ្នកថតអាជីពដ៏ល្បីល្បាញដំបូងរបស់កម្ពុជា មានស្នាដៃទទួលស្គាល់ជាលក្ខណៈអន្តរជាតិ៕
