ជាការពិតណាស់ នៅក្នុងឆ្នាំ ២០២៥ នេះ ខ្សែភាពយន្តរឿង «ភ្លើងឆេះក្លឹបក្រោមដី» របស់ផលិតកម្ម LD ត្រូវបានចាត់ទុកថា ជាភាពយន្តខ្មែរ ដែលជោគជ័យខ្លាំងបំផុត ដោយមានការទស្សនា និង រកចំណូលបានច្រើនជាងរឿងណាៗទាំងអស់ក្នុងដើមឆ្នាំ ២០២៥ នេះ។
យ៉ាងណាមិញ បើទោះជារឿង «ភ្លើងឆេះក្លឹបក្រោមដី» កំពុងផ្ទុះល្បីខ្ទរខ្ទារយ៉ាងណាក្តី ស្រាប់តែ លោក លៀក លីដា បានចេញមកបង្ហោះសារ បង្ហាញពីការយល់ឃើញនៃភាពយន្តខ្មែរក្នុងឆ្នាំ ២០២៥ នេះ នឹងដើរថយក្រោយ ខណៈមិនទាន់ឃើញមានផលិតករណាម្នាក់ គ្រោងវិនិយោគផលិតរឿងធំៗ ស្តង់ដាសម្រាប់ក្រៅប្រទេសនោះ។
ក្នុងនោះ លោក លៀក លីដា បានរៀបរាប់ថា៖ «បើទោះបីជារឿង «ភ្លើងឆេះក្លឹបក្រោមដី» របស់ផលិតកម្ម អិលឌី ទទួលបានជោគជ័យខ្លាំងក៏ដោយ ក៏ខ្ញុំនៅតែយល់ថាវិស័យភាពយន្តរបស់យើងក្នុងឆ្នាំ ២០២៥ នឹងដើរថយក្រោយ ពីព្រោះខ្ញុំមិនទាន់ឃើញសញ្ញានៃផលិតករណាមួយ ដែលគ្រោងនឹងវិនិយោគផលិតរឿងធំៗ និង គម្រោងចំណាយស្តង់ដាសម្រាប់ទីផ្សារក្រៅប្រទេសឡើយ។ តែខ្ញុំបែរជាឃើញកុនបរទេសយ៉ាងសម្បូរបែប បកប្រែយ៉ាងល្អចូលទីផ្សារយើងយ៉ាងច្រើនក្នុងឆ្នាំ ២០២៥ នេះ។ សូមបងប្អូនផលិតករយើង រួមគ្នា ដើម្បីផលិតកុនធំៗ ដែលមានស្តង់ដារត្រឹមត្រូវ ដែលអាចចូលទីផ្សារបរទេសបានត្រឹមត្រូវដោយមិនអៀនខ្មាស់។ សូមជូនពរ ផលិតករខ្មែរទាំងទទួលបានជោយជ័យ»៕
